Արդեն մոտ մեկ ամիս է, ինչ Արաբական արևելքն ալեկոծվում է հանրահավաքներից և բախումներից: Ալժիրին, Թունիսին, Եգիպտոսին հիմա էլ միանում է Հորդանանը: Ճիշտ է, այս երկրում մի քանի շաբաթ առաջ տեղի էին ունեցել բախումներ, որից հետո իշխանություններին հաջողվել էր գներն իջեցնելու միջոցով սաստել փողոց դուրս եկածներին, սակայն դա բավարար չեղավ, և երեկ հորդանանցիները կրկին փողոց են դուրս եկել:
Ակնհայտ է, որ այս հանրահավաքների վրա իրենց ազդեցությունն են ունեցել եգիպտոսյան դեպքերը, որոնք երեկ վերածվել էին մեծածավալ բախումների:
Սակայն իրավիճակը Հորդանանում փոքր-ինչ այլ է, և երկրի ղեկավարի` Աբդալլահ 2-րդի նկատմամբ էլ վերաբերմունքը նույնպես:
Հորդանանցիները ավանդաբար երկրի սոցիալ-տնտեսական իրավիճակի համար միշտ պատասխան են պահանջում երկրի վարչապետից: Այս դեպքում էլ երեկ փողոց դուրս եկած հազարավոր հորդանանցիներ պահանջել են գործող վարչապետ Սամիր Ալ-Ռիֆայի հրաժարականը, ինչպես նաև կրկին պահանջել են իջեցնել սպառողական ապրանքների գները: Այս մասին հաղորդորդում է Associated Press գործակալությունը:
Հավաքվածների մեծ մասն, ըստ գործակալության, ընդդիմության և ծայրահեղական կազմակերպությունների ներկայացուցիչներ էին: Նրանց թիվը չի անցել 3500-ից:
Մոտ 2000 մարդ էլ հորդանանյան այլ քաղաքներում բողոքել են իշխանությունների վարած քաղաքականությունից:
Այստեղ պետք է ուշադրություն դարձնել այն հանգամանքին, որ երկրի ներսում մեծ է պաղեստինցիների ազդեցությունը, որոնց թիվն այստեղ բավականին մեծ է: Այս համայնքը հորդանանյան իշխանությունների հետ ավանդապես լուրջ հակասությունների մեջ է, և ակնհայտ է, որ եթե պաղեստինցիներն այստեղ պարարտ հող գտնեն, անպայման կօգտվեն առիթից և կարող են հակաթագավորական հուզումներ կազմակերպել: