Մայիսի 6-ի ընտրություններն ազատ, արդար և կայացած էին. սա «Սոցիոմետր» սոցիոլոգիական կենտրոնի ղեկավար Ահարոն Ադիբեկյանի գնահատականն է անցած ընտրություններին: Ըստ նրա` ընտրատարածքներում անցկացված ընտրությունը շատ նորմալ էր և միջազգային չափանիշներին համապատասխան, իսկ ինչ կատարվում էր ԸՏ-ներից դուրս, դրա համար բոլորս ենք պատասխանատու:
«Առաջին լրատվական»-ի հարցին` ինչքա՞ն գումար է բաժանվել ձայներ գնելու համար, և որքանո՞վ է դա ազդել ընտրությունների արդյունքների վրա, Ա. Ադիբեկյանը պատասխանեց` վաճառվել է ձայների 3-5%-ը, և ծախսվել է 2-2.5 մլն դոլար, իսկ բաժանել են հիմնականում մեծամասնական թեկնածուները:
«2/3-ն ընտրությունների գալիս է ազատ, արդար մղումներով: Ժողովրդավարությունը մեզ մոտ հաղթել է»,- հայտարարեց սոցիոլոգը:
Մեր դիտարկմանը, թե մեծամասնականով հաղթել են միայն ՀՀԿ-ական և ԲՀԿ-ական թեկնածուները. Արդյո՞ք դա նշանակում է, որ հենց նրանք են ձայներ գնել, Ա. Ադիբեկյանը պատասխանեց՝ հիմնականում, այո՛:
Նշելով, որ Հայաստանում հեղափոխությունից մարդիկ վախենում են, Ադիբեկյանը ՀՀԿ համար կանխատեսեց երկարատև կառավարում, և դրա դեմ չի օգնի նաև սերնդափոխությունը, քանի որ սերունդների միջև կապն ուժեղ է:
Սոցիոլոգի խոսքով՝ ՀՀԿ վարկանիշի վրա չի ազդել Հանրապետության հրապարակում տեղի ունեցած միջադեպը, քանի որ դրա ազդեցությունը տարածվելու համար ժամանակ էր հարկավոր, որը չկար, ՀԱԿ-ից որոշ ձայների տարուբերում եղավ Լևոն Տեր-Պետրոսյանի առողջական խնդիրների պատճառով, իսկ ՕԵԿ-ը եղել է, կա և կմնա իշխանություն, քանի որ նա ունի իշխանական ռեսուրս և «վարիանտ չէ, որ իշխանական թևն իրեն կերակրողին ձայն չտա»:
Միաժամանակ, Ա. Ադիբեկյանը հայտարարեց, թե ընտրությունները կրկնեցին իր հարցումների արդյունքները, և ի տարբերություն Գելափի, ինքը ռիսկ չէր անի հարցում անցկացնել, օրինակ, Զիմբաբվեում, որտեղ չգիտի ցեղախմբերի հարաբերությունները: Ադիբեկյանի բնութագրմամբ` «Սոցիոմետր»-ը լավագույն բրենդային կենտրոնն է, իսկ ինքն իրեն էլ նա բնոոթագրեց որպես սոցիոլոգ-մարգարեի:
Լուսանկարը՝ PanARMENIAN Photo-ի
