Իզմիրի Քարշըյաքա շրջանի վարչակազմը դիմել է Կարսի վարչակազմին հայ-թուրքական բարեկամության արձանը իրենց մոտ տեղափոխելու հարցումով: «Մենք կոթողի կարիք ունենք և որոշել ենք այդ արձանը տեղափոխել մեզ մոտ»,- ասել է Քարշըյաքայի վարչակազմի մամլո խորհրդական Սեդաթ Սյոզերին:
Այս մասին տեղեկացնում է hyurrietdaulynews-ը: Սյոզերիի խոսքով, կոթողն իրենց մոտ տեղափոխելու որոշումն ընդունվել է Կարսում դրա քանդման մասին որոշումից հետո: Քարշըյաքայից արդեն 9 հոգանոց պատվիրակություն է մեկնել Կարս տեղափոխման հնարավորություններին ծանոթանալու համար:
«Մենք չենք քննարկում՝ արձանը գեղեցիկ է, թե տգեղ, մենք դրա կարիքն ունենք ու մենք կվերցնենք այն»,- ասել է Սյոզերին: Պաշտոնյան չի մեկնաբանել այն հարցը, թե կա՞ արդյոք արձանի տեղափոխման համար այլ պատճառ: Կոթողի հեղինակ, ճարտարապետ Մեհմեթ Աքսոյը համարում է, որ տեղափոխումը կզրկի արձանը իր խորհրդանշական էությունից, քանի որ Կարսում տեղադրվելով՝ այն խորհրդանշում էր հայ և թուրք ժողովուրդների բարեկամությունը:
Նա համոզված է, որ այն պետք է մնա իր ներկայիս տեղում: Ճարտարապետը նշել է, որ շատ զարմացած է արձանի շուրջ վերջին զարգացումներից: Նա կարծում է, որ տեղափոխումն անհնար է, և արձանը հնարավոր է քանդել միայն դինամիտով: Կարսի վարչակազմում հերքում են այս կարծիքը, և ներկայումս քննարկվում է արձանի հնարավոր ապամոնտաժման տարբերակը, որպեսզի այն նվազագույն վնասվածքներով հնարավոր լինի տեղափոխել Իզմիր:
