2011 թ. հոկտեմբերին սպանված Լիբիայի առաջնորդ Մուամար Քադաֆիի դուստրը դիմել է ՄԱԿ-ի Անվտանգության խորհրդին և Հաագայի Միջազգային քրեական դատարանին (ՄՔԴ)՝ պահանջելով հետաքննել իր հոր մահվան գործը: Այս մասին հաղորդում է RIA Novosti-ն՝ վկայակոչելով արաբական ԶԼՄ-ներին:
Աիշա Քադաֆին ՄԱԿ-ի ԱԽ-ին և ՄՔԴ-ին ուղերձ է հղել իր փաստաբանների միջոցով, որում իր հոր և եղբայրներից մեկի՝ Մութթասիմի սպանությունն անվանել է «ռազմական հանցագործություն» և պահանջել է անկախ միջազգային հետաքննություն անցկացնել:
Աիշա Քադաֆին, ինչպես նաև Մուամար Քադաֆիի այրին՝ Սոֆյան, և երկու որդիները՝ Մուամարը և Հանիբալը, իրենց ընտանիքներով Ալժիր էին փախել ապստամբների կողմից մայրաքաղաք Տրիպոլիի գրավումից հետո՝ 2011 թ. օգոստոսին: Ալժիրում նրանք քաղաքական ապաստան են ստացել:
Լիբիայի նոր իշխանությունները բազմիցս պահանջել են հարևան պետություններից, այդ թվում՝ Ալժիրից, իրենց հանձնել Քադաֆիի ազգականներին, սակայն Ալժիրը մերժել է: Այս պահին Տրիպոլին բանակցություններ է վարում Նիգերի հետ՝ Քադաֆիի որդի Սաադիին հանձնելու շուրջ: Քադաֆիի մյուս որդին՝ Սեյֆ Ալ-Իսլամը, Լիբիայի տարածքում է և սպասում է իր դատավարությանը:
