Ամերիկյան Նևադա և Կալիֆոռնիա նահանգի բնակիչները հսկա երկնաքարի անկման ականատեսն են դարձել: Այս մասին գրում է Reuters-ը:
Ապրիլի 22-ի առավոտյան՝ տեղական ժամանակով ժամը 8-ին, երկնակամարում երկնաքար և լույսի հետք է երևացել: Associated Press-ի փոխանցմամբ՝ երկնաքարը երևացել է Նեվադայի Ռինո քաղաքից մինչև Կալիֆոռնիայի Սան Ֆրանցիսկո և Բեյքերսֆիլդ քաղաքներն ընկած տարածքում: Կալիֆոռնիայի հարավում ամպամածության պատճառով այն չի երևացել:
Երկնքարի ի հայտ գալն ուղեկցվել է ուժգին աղմուկով: Ականատեսների խոսքով՝ տները դղրդացել են: Փորձագետների կարծիքով այն հավանաբար պայթել է երկնքում: Ոստիկանությունը տեղի բնակիչներից բազմաթիվ զանգեր է ստացել: Նյութական վնասների և զոհերի մասին տեղեկություններ չկան:
Նշենք, որ ամեն տարի ապրիլի երկրորդ կեսին Երկիրն անցնում է երկնաքարային հոսքի միջով:
