Մեկ շարժիչով մասնավոր ինքնաթիռ է ընկել կենդանաբանական այգու վրա` Գվատեմալայի հարավային արվարձանում, ինչի հետևանքով երեք մարդ է զոհվել, հաղոդում է korrespondent.net-ը:
Ինքնաթիռի օդաչուն մայրաքաղաքային La Aurora օդնավակայանից, որը գտնվում է կենդանաբանական այգու մոտ, թռիչքից անմիջապես հետո դիսպեչերին հաղորդել է խնդիրների մասին: Արտակարգ վայրէջք կատարելու փորձի ժամանակ ինքնաթիռն ընկել է և այրվել:
Զոհվել են օդանավում գտնվող օդաչուն, նրա օգնականը և ուղևորը: Կենդանաբանական այգու աշխատակիցներից մեկը խոր այրվածքներ է ստացել և հոսպիտացվել:
Ականատեսների վկայությամբ` օդաչուն կարողացել է վերջին պահին ինքնաթիռն ուղղել դեպի մանկական դատարկ հրապարակը, ինչի շնորհիվ հնարավոր է եղել խուսափել բազմաթիվ զոհերից, քանի որ շաբաթ երեկոյան կենդանաբանական այգում բազմաթիվ այցելուներ են եղել:
