Ռուսաստանի Տուլայի մարզում հայ գործարար Գեղամ Սարգսյանի տան վրա իրականացված հարձակման գործով քննիչները կքննեն գործարարի որդուն: Այս մասին հաղորդում է RIA Novosti-ն՝ վկայակոչելով Տուլայի մարզի քննչական կոմիտեի ներկայացուցիչ Տատյանա Գրիզլովային:
Հիշեցնենք. 2012 թ. ապրիլի 7-ին Տուլայի մարզում 4 հանցագործ ավազակային հարձակում էին իրականացրել հայ գործարար 52-ամյա Գեղամ Սարգսյանի տան վրա: Սարգսյանից բացի՝ այդ ժամանակ տանը եղել են նրա կինը, դուստրը և վերջինիս 4 անչափահաս երեխաները: Ինքնապաշտպանության նպատակով Սարգսյանը դանակահարել էր վրացերեն խոսող 3 հանցագործներին, մյուսին հաջողվել էր փախուստի դիմել:
Գրիզլովայի խոսքերով՝ այս պահին ուսումնասիրվում է հարձակման գործում Սարգսյանի որդու հնարավոր մասնակցության տարբերակը, որը որոշ ժամանակ առաջ արտաքսվել էր Վրաստան:
«Դա տարբերակներից մեկն է, որն ուսումնասիրվում է: Սարգսյանի որդին արտաքսվել էր Վրաստան: Իրավապահ մարմինները միջոցներ են ձեռնարկում նրա գտնվելու վայրը պարզելու համար»,- ասել է Գրիզլովան:
Դեպքից անմիջապես հետո ոստիկանությունը քայլեր է ձեռնարկել Սարգսյանի ընտանիքի անվտանգությունն ապահովելու համար: Տունը գտնվում է ոստիկանության մշտական հսկողության տակ, իսկ Սարգսյանի թոռնուհին դպրոց է գնում և այնտեղից տուն վերադառնում իրավապահ մարմինների ուղեկցությամբ:
Հետաքննության տվյալներով՝ 4 հանգացործները եղել են ծնունդով Վրաստանից և Ռուսաստանից, ապրել են Մոսկվայում և Մոսկվայի մարզում: Մեքենան, որով հանցագործները հասել էին Սարգսյանի տուն, հայտնաբերվել է նույն թաղամասում և առգրավվել՝ որպես իրեղեն ապացույց:
Այս պահին ինքը՝ Գեղամ Սարգսյանը, գտնվում է հիվանդանոցում դանակով հասցված վերքերով և գանգուղեղային վնասվածքով: Նրա դեմ մեղադրանք չի առաջադրվել, քանի որ նրա գործողությունը գնահատվել է որպես ինքնապաշտպանություն:
