Եգիպտոսի նախագահի ընտրությունների երկու ականավոր թեկնածուներ` սալաֆիտական պահպանողական քարոզիչ Հազեմ Սալահ Աբու Իսմայիլը և հետախուզության նախկին ղեկավար Օմար Սուլեյմանը, վերջնականապես դուրս են մնացել նախագահական ընտրարշավից: Այս մասին այսօր հայտարարել է երկրի Կենտրոնական ընտրական հանձնաժողովը:
Անցյալ շաբաթ հանձնաժողովը մերժել է գրանցել 23–ից 10-ի թեկնածությունը` մեկնաբանելով, որ նրանք չեն կատարել ընտրություններին մասնակցելու մեկ կամ մի քանի պայմաններ, որոնք նախատեսված են սահմանադրությամբ։ Նախագահի թեկնածուի կարգավիճակից զրկվել է նաև Այման Նուրը, ով 2005 թ. նախագահական ընտրությունների ժամանակ Հոսնի Մուբարաքի հակառակորդն է եղել: Դեռևս բաց է մնում «Մուսուլման եղբայրներ»-ի թեկնածու Հեյրաթ Աշ-Շաթերի հարցը, ում փաստաթղթերը դեռևս դիտարկման փուլում են գտնվում:
Սուլեյմանին մասնավորապես թույլ չեն տվել մասնակցել նախագահական ընտրություններին այն պատճառով, որ նա Եգիպտոսի շրջաններից մեկում չի հավաքել 1000 անհրաժեշտ ստորագրություն: Իսկ թեկնածուներից մեկին մերժել են այն պատճառով, որ նրա մայրն ունեցել է երկքաղաքացիություն, որոնցից մեկը՝ ամերիկյան։
