Coca-Cola ոչ ալկոհոլային խմիչքներ արտադրող աշխարհի խոշորագույն ընկերությունը Սինգապուրի Ազգային համալսարանի շենքում տեղադրել է ավտոմատ, որը գազավորված ըմպելիք է տալիս նրան, ով փաթաթվում է իրեն։ Այս մասին հաղորդում է Mashable-ը:
Սարքը տեղադրվել է ընկերության կողմից իրականացվող Open Happiness ծրագրի շրջանակներում: Coca-Cola-ի ֆիրմային կարմիր-սպիտակ գունային համադրությամբ ներկված ավտոմատի վրա գրված է. «Գրկի՛ր ինձ»: Ի պատասխան գրկախառնության՝ ավտոմատը տալիս է մեկ շիշ կոլա:
Ավելի վաղ Open Happiness-ի շրջանակներում Coca-Cola-ն աշխարհի մի քանի քաղաքներում տեղադրել էր «երջանիկ» ավտոմատներ: Այսպես, 2011 թվականին «շռայլ» ավտոմատը տեղադրվել էր Վորոբյովյան լեռներում՝ Մոսկվայի պետական համալսարանի մոտ: Ըմպելիքի տարայի կամ շշի հետ միասին ավտոմատը դուրս էր բերում նաև մարզաշապիկներ, ծաղիկներ և այլ նվերներ:
Ավտոմատներից մեկն էլ, որը ԱՄՆ քոլեջներից մեկում տեղադրվել էր 2010 թվականի հունվարին, մեկ շշի փոխարեն միանգամից «տալիս էր» մի քանի շիշ Coca-Cola, ինչպես նաև՝ ծաղիկներ և պիցցա:
Coca-Cola ընկերությունը հիմնադրվել է 1892 թվականին: 2010 թ. այն աշխարհում ամենաթանկարժեք բրենդների շարքում զբաղեցրել էր երրորդ տեղը: Coca-Cola-ի ապրանքանիշը գնահատվել է 34.8 միլիարդ դոլար: Open Happiness ծրագիրը մեկնարկել է 2009 թվականին:
