Ուկրաինան կարող է Ռուսաստանին հանձնել ՌԴ վարչապետ Վլադիմիր Պուտինի դեմ մահափորձի նախապատրաստման երկու կասկածյալներին: Այս մասին այսօր լրագրողներին է հայտնել երկրի գլխավոր դատախազության մամլո ծառայության ղեկավար Յուրի Բոյչենկոն: «Համապատասխան գործընթացների ավարտից հետո հնարավոր է երկու կասկածյալների հետ հանձնումը ՌԴ–ին՝ նրանց քրեական պատասխանատվության առջև կանգնեցնելու համար»,- ասել է Բոյչենկոն՝ հավելելով, որ հնարավոր հետ հանձնման որոշումը կընդունի ուկրաինական դատարանը։ Այս մասին հաղորդում է ИТАР ТАСС-ը:
Խոսքը վերաբերում է Չեչնիայի բնիկ Ադամ Օսմաևին և Ղազախստանի քաղաքացի Իլյա Պյանզինին: Նրանց կասկածում են ՌԴ կառավարության ղեկավարի դեմ մահափորձ կազմակերպելու մեջ:
Գլխավոր դատախազության ներկայացուցչի խոսքերով՝ Կիևը կարող է Ռուսաստանին հանձնել Ուկրաինայում բացված քրեական գործի նյութերը: «Նյութերը կհանձնվեն Ռուսաստանի դատախազությանը՝ հետաքննություն վարելու համար»,- նշել է Բոյչենկոն:
Ավելի վաղ հաղորդվում էր, որ Ուկրաինայի և ՌԴ–ի հատուկ ծառայություններն Օդեսայում ձերբակալել են ենթադրվող հանցագործներին, ովքեր գտնվում էին միջազգային հետախուզման մեջ: Նրանց ցուցմունքներից պարզվել է, որ Ռուսաստանում մարտի 4-ին տեղի ունեցած ընտրություններից անմիջապես հետո իրենք նախատեսել էին մահափորձ իրականացնել Պուտինի դեմ:
Հետաքննության տվյալներով, թաքնվելով Անվտանգության դաշնային ծառայությունից, ահաբեկիչները գաղտնի ժամանել են Ուկրաինա: Օդեսայում վարձակալված բնակարանում նրանք զբաղվել են պայթուցիկներ պատրաստելով, որի արդյունքում հունվարի 4-ին տեղի է ունեցել ինքնաբուխ պայթյուն, ապա՝ հրդեհ:
