Այսօր գյուղնախարարության բուսաբուծության վարչության պետ Գագիկ Մանուչարյանից փորձեցինք պարզել, թե հայկական ծիրանից բացի` ունե՞նք մրգի այլ տեսակներ, որոնք արտերկրում ևս մեծ պահանջարկ ունեն, ինչը կնպաստի արտահանման ծավալների մեծացմանը և գյուղացիներիեկամուտների ավելացմանը։ Նա նշեց, որ Հայաստանը մրգերի տեսանկյունից ինքնաբավ երկիր է և ավելացրեց. «Ծիրանից բացի, մեր դեղձը շատ լավն է և նույնիսկ բրենդ է հանդիսանում իր համային հատկությունների շնորհիվ։ Մենք ամեն տարի արտահանում ենք ծիրան, դեղձ, սալոր, խաղող, կեռաս։ Հիմնականում արտահանվում է Ռուսաստանի Դաշնություն, որոշ մշակաբույսեր` Վրաստան։ Խաղողը արտահանվում է Ուկրաինա, արտահանում ենք Իրան, Իրաք։ Ծիրանը անցյալ տարի արտահանվել է Ռուսաստանի Դաշնություն, Վրաստան, Ուկրաինա, Չինաստան, դեղձը` Ռուսաստանի Դաշնություն, խաղողը` Ռուսաստանի Դաշնություն և Բելառուս, սալորը` Ռուսաստանի Դաշնություն, կեռասը` Ռուսաստանի Դաշնություն և Վրաստան։ Հիմնականում այս մրգերն ենք արտահանում, բայց կան մրգեր, որոնք որոշ տարիների Բելգիա և Գերմանիա են արտահանվում, բայց քիչ քանակությամբ»։ Այն հարցին, թե մեր մշակվող տարածքները ընդլայնվելու հնարավորություն ունե՞ն, ինչը կընդլայնի նաև արտահանումը` պատասխանեց. «Իհարկե ունեն, և այդ ուղղությամբ աշխատանքներ տարվում են։ Մեզ մոտ հիմա շատ մեծ ուշադրություն է դարձվում վերամշակման ձեռնարկություններին` Սիս, Նոյան, Կիլիկիա, որոնց միջոցով միրգը կարտահանվի նաև բնական հյութերի տեսքով»։
