News Georgia-ի փոխանցմամբ`Թբիլիսիի քաղաքապետարանի նախաձեռնությամբ քաղաքային տրանսպորտի պարկը մոտ ապագայում համալրվելու է հարմարավետ, էկոլոգիապես մաքուր և երթևեկության առումով անվտանգ տրանսպորտով՝ տրամվայով: «Թբիլիսյան տրամվայ» նախագծի շնորհանդեսը տեղի է ունեցել «Ռեդիսոն» հյուրանոցում:
Թբիլիսիի քաղաքապետարանի տրանսպորտային ծառայության ղեկավար Ակակի Ջոհաձեն հայտարարել է, որ տրամվայի առաջին գծի երկարությունը կազմում է 14 կիլոմետր, որի վրա առկա է 23 կանգառ. «4 րոպե ընդմիջմամբ այդ հեռավորության հաղթահարումը պահանջելու է 34 րոպե: Նախնական հաշվարկներով օրական մոտ 100,000 մարդ կարող է օգտվել տրանսպորտի այդ տեսակից»:
Թբիլիսիի քաղաքապետարանը վստահ է, որ տրամվայը խնդիրներ չի ստեղծի քաղաքային երթևեկության մեջ: Նախնական տեղեկություններով՝ տրամվայի գիծն ամբողջովին շահագործման կհանձնվի դրա կառուցման մեկնարկից կես տարի անց:
Հիշեցնենք, որ նախորդ տարվա հունիսի սկզբներին Թբիլիսիի քաղաքապետ Գիգի Ուգուլավան հայտարարել էր, որ 2013 թվականին Թբիլիսիում սկսվելու է տրամվայի համակարգի կառուցումը.
«Ներկայումս ընթանում են տրամվայի դիզայնի ստեղծման աշխատանքները։ Մենք չենք ցանկանում, որ այն նույնացվի մետրոպոլիտենին, ինչպես որ տրամվայի հին համակարգերի դեպքում էր։ Տրամվայը պետք է լրացնի մետրոպոլիտենը և ընդլայնի այն։ Օրինակ՝ այնտեղ, ուր գործում են մետրոպոլիտենի կայարանները, անիմաստ է տրամվայի անցկացումը։
Առաջիկա 4-5 տարիների մեր առաջադրանքն այն է, որ քաղաքային տրանսպորտը բաղկացած լինի միայն էլեկտրատրանսպորտից, իսկ դիզելային և այլ տիպի վառելիքով աշխատող տրանսպորտը կենտրոնացվի մասնավոր օպերատորների ձեռքում»։
