«Առաջին լրատվական»-ին հայտնի է դարձել երեկ՝ ժամը 13.30-ի սահմաններում, ԵՊՀ կենտրոնական մասնաշենքի 1-ին հարկի նախասրահում ԵՊՀ ուսանողներ, 21-ամյա Սարգիս Նազարեթյանին և 19-ամյա Գոռ Խաչատրյանին դանակահարած անձի ինքնությունը: Ըստ մեր ունեցած տեղեկությունների` ուսանողներին դանակահարել է ԵՊՀ մասնաշենքերից մեկի պատճենահանման բաժնի աշխատակիցը:
ՀՀ ոստիկանության լրատավական ծառայությունից փորձեցինք ճշտել մեր ունեցած լուրի հավաստիությունը, սակայն Արմեն Մալխասյանը «Առաջին լրատվական»-ին հայտնեց, որ դանակահարողի ինքնությունն առայժմ պարզ չէ:
Նշենք, որ այս պահին ԵՊՀ միջազգային հարաբերությունների ֆակուլտետում սովորող երկու ուսանողների առողջական վիճակը կայուն է: Այս մասին «Առաջին լրատվական»-ին հայտնեց ֆակուլտետի դեկան Գեղամ Պետրոսյանը: «Թե ովքեր են կատարել՝ ոչինչ ասել չեմ կարող, վարկածներով իրավական մարմիններն են զբաղվում։ Մի բան հաստատ կարող եմ ասել, որ վեճը ֆակուլտետի ուսանողների միջև չի եղել», – մեզ հետ զրույցում նշեց դեկան Պետրոսյանը: Դեկանի խոսքով` ուսանողները 14.30-ին պետք է դասի լինեին, իսկ միջադեպը եղել է շատ ավելի շուտ: «Մենք փորձում էինք հասկանալ, թե ուսանողներն այդ դեպքում ինչու են շուտ եկել համալսարան, սակայն տղաներից մեկը ` Նազարեթյանը, բարձր առաջադիմություն ունեցող տղա է, գրադարան է ավելի շուտ գալիս: Մյուս տղայից` Գոռ խաչատրյանից, ևս այսքան ժամանակ որևէ ավելորդ բան չեմ նկատել»,- ասաց Գեղամ Պետրոսյանը:
Հիշեցնենք, որ երեկ` ժամը 14.10-ին, հիվանդանոցից ոստիկանության Մարաշի բաժանմունքում ահազանգ է ստացվել, որ Երևանի պետական համալսարանի մոտից որովայնի վնասվածքով բուժօգնության է տեղափոխվել 1990 թ. ծնված Սարգիս Նազարեթյանը: Ժամը 15.30-ին հիվանդանոցից կրկին ահազանգ է ստացվել, որ նույն վայրից և համանման վնասվածքով բուժօգնության է տեղափոխվել 1992 թ. ծնված Գոռ Խաչատրյանը: Պարզվել է, որ անհայտ անձը սուր կտրող գործիքով մարմնական վնասվածքներ է պատճառել Ս. Նազարեթյանին և Գ. Խաչատրյանին:
Ըստ «Առաջին լրատվական»-ի տեղեկությունների` դանակահարված ուսանողները մորաքրոջ տղաներ են: Նրանք ոստիկաններին պատմել են, որ ԵՊՀ տարածքում տեսել են, թե ինչպես են մի քանի տղաներ համալսարանի իրենց ծանոթ աղջկա հետևից անշնորհք արտահայտություններ անում, և մորաքրոջ տղաներից մեկը մոտեցել է՝ պարզելու, թե ինչ է կատարվում, սակայն միանգամից ծեծկռտուք է սկսվել: Եղբորն օգնության է շտապել տղաներից մյուսը, և երկուսն էլ նույն պահին դանակահարվել են:
