Համացանցն այսօր նույնպես տոնում էր Ապրիլի մեկը` իր օգտատերերին առաջարկելով ժամանակը հետաքրքիր ու զվարճալի անցկացելու նոր եղանակներ:
Դրանցից մեկը, PCWorld-ի հաղորդմամբ, Google Racing-ն է: Հավանաբար շատերն են ծանոթ Google-ի ինքնակառավարվող մեքենաներին: Բայց այժմ համահիմնադիր Սերգեյ Բրինը հայտարարել է, որ ընկերությունը պատրաստվում է տեխնոլոգիան ևս մեկ մակարդակով զարգացնել` համագործակցելով NASCAR–ի հետ: Հայտարարությունն այնքան հիանալի է, որ շատերը սկսել են կասկածել, որ այն իրական է: Եվ այն իրական չէ, անշուշտ:
Միևնույն ժամանակ հայտարարություն է եղել այն մասին, որ Sony-ն ներկայացնում է շատ փոքրիկ Ultrabook, որը կլինի աշխարհում ամենափոքրը և կունենա շուկայում ամենահարթ էկրանը: Սա նույնպես հիանալի կլիներ, եթե միայն իրական լիներ:
Google-ը ևս մեկ հետաքրքիր, բայց անիրական գաղափար ունի: Ընկերությունը ներկայացնում է Gmail Tap-ը: Իր պատրաստած տեսանյութում ընկերության ներկայացուցիչներն ասում են, որ քանի որ հոգնել են QWERTY ստեղնաշարից, այն որոշել են փոխարինել Մորզեի կոդով: Ըստ ընկերության՝ այժմ արդեն հնարավոր կլինի էլեկտրոնային նամակներ ուղարկել Gmail-ի միջոցով` օգտագործելով միայն կետ ու գիծ նշանները և միևնույն ժամանակ հնարավորություն կլինի նամակներն ուղարկել երկու տարբեր մարդկանց:
Youtube-ն իր օգտատերերի համար առավել «լուրջ» առաջարկ ունի: Բոլոր նրանք, ովքեր խնդիր ունեն համացանց մուտք գործելու հետ, այժմ կարող են օգտվել YouTube Collection-ից, որն առաջարկում է կայքում 2005 թվականից ի վեր տեղադրված բոլոր տեսանյութերի DVD տարբերակները: Եթե դուք ցանկանում եք օգտվել առաջարկից, ապա YouTube-ը ձեր տուն կուղարկի 175 մեծ մեքենաներ, որոնցում կլինի տեսանյութերի ողջ հավաքածուն:
