Հյուսիսային Կորեան այսօր փորձարկել է կարճ հեռահարության երկու հրթիռ: Այս մասին հաղորդում է Reuters գործակալությունը` հղում կատարելով Հարավային Կորեայի պաշտպանության նախարարության աղբյուրներին:
Հարավկորեական աղբյուրները նշում են, որ այդ հրթիռները հականավային համակարգերի մաս են, սակայն, հավանաբար, կապ չունեն հեռահար բալիստիկ հրթիռների փորձարկումների հետ:
Հիշեցնենք, որ վերջին օրերին հյուսիսկորեական հրթիռային փորձարկումների շուրջ մեծ աղմուկ է բարձրացել: Ի պատասխան Հարավային Կորեայում անցկացվող խոշոր գագաթնաժողովին, որտեղ քննարկվել են աշխարհում միջուկային անվտանգության հարցեր, և որին մասնակցել են 58 երկրների ղեկավարներ, Հյուսիսային Կորեան հայտարարել է, որ պատրաստվում է արբանյակ դուրս բերել ուղեծիր`գործարկելով նոր տիպի հրթիռ:
Հիշեցնենք նաև, որ այսօր ճապոնիայի իշխանությունները որոշում են կայացրել ոչնչացնել բոլոր նման հրթիռները, եթե նրանք հատեն Ճապոնիայի օդային տարածքը:
