ՕԵԿ մամուլի նախկին քարտուղար Սուսաննա Աբրահամյանը չի լքել և չի լքելու կուսակցությունը, նա, ուղղակի վայր է դրել իր` մամուլի քարտուղարի լիազորությունները. այսօր կայացած մամուլի ասուլիսի ժամանակ հայտարարեց ՕԵԿ փոխնախագահ Հեղինե Բիշարյանը` խորհուրդ տալով հարցը չքաղաքականացնել:
Անդրադառնալով այն փաստին, որ կուսակցության ցուցակը եզրափակում է Ազգային անվտանգության խորհրդի անձնակազմի վարորդ Արթուր Մարգարյանը, քաղաքական գործիչը նկատեց, որ դրանում ոչ մի զարմանալի բան չկա:
«Ցուցակում ներառված մարդիկ բոլորն էլ բարձրագույն կրթություն ունեն: Նույն ձեր նշած վարորդն անգամ երկու ինստիտուտ է ավարտել: ՕԵԿ-ն ընդամենը փորձել է իր ցուցակում ներգրավել սոցիալական տարբեր շերտերի ու խավերի ներկայացուցիչների»,- ասաց նա:
Բիշարյանի խոսքով՝ ՕԵԿ-ը մշտապես մրցունակ ծրագրեր է ներկայացրել, հետևողական է եղել դրանց իրագործմանը, ինչի արդյունքում էլ մի ստվար ընտրազանգված միշտ իրենց կողքին է:
«Ընտրությունների նախաշեմին մեզ մրցակից ենք համարում անխտիր բոլոր քաղաքական ուժերին, ընդ որում, որևէ կապ չունի` որ կուսակցությունը որ թևից է: Այստեղ բոլորը հավասար մրցակցում են, և ՕԵԿ-ը մինչև վերջ է կատարելու իր առաքելությունը: Կարծում եմ, որ քարոզարշավը պետք է լինի գաղափարների և ծրագրերի շուրջ`բացառելով մեկը մյուսի վրա «ցեխ շպրտելու» էժանագին սովորությունը»:
Խոսելով ոստիկանության անձնագրերի և վիզային վարչության կողմից ընտրողների թվաքանակին վերաբերող հրապարակման, ինչպես նաև ՀՀ ընդհանուր բնակչության ԱՎԾ տվյալների մասին` Բիշարյանը նկատեց, որ ինքը հիմքեր չունի կասկածելու թվերի անհամապատասխանությանը:
«Ես հիմքեր չունեմ չհավատալու պետական մարմինների հրապարակած թվերին: Խնդիրն ավելի խորքային կերպով չեմ ուսումնասիրել, որպեսզի իմ կարծիքն ասեմ»,- ասաց Հեղինե Բիշարյանը:
Հարցին` տիրապետո՞ւմ է երկրում առկա արտագաղթի մակարդակին, ՕԵԿ փոխնախագահն ասաց, որ ինքը լուսնի վրա չի ապրում և պատկերացում ունի այդ խնդրի մասին:
Ամփոփելով` Բիշարյանը հրաժարվեց պատասխանել լրագրողներից մեկի այն հարցին, թե՝ ինչպե՞ս կմեկնաբանի փորձագիտական հետևյալ կարծիքը. եթե Արթուր Բաղդասարյանից ու նրա կնոջից բացի՝ ՕԵԿ-ին որևէ մեկը ևս ձայն տված լինի, կնշանակի ընտրությունները կեղծված են: «Նման ոչնչությունների կարծիքները ոչնչություն են, և ես դրանք չեմ մեկնաբանում: Զրոյի կողքին զրո ես գրում՝ էլի զրո է ստացվում»,- ասաց նա:
Հեղինե Բիշարյանը խորհուրդ է տալիս, որ ամեն մարդ իր համար քնի և իր համար երազ տեսնի՝ պատասխանելով լրագրողներից մեկի այն հարցին, թե Էդուարդ Մադաթյանը («Խուճուճ Էդո») դուրս է եկել ՕԵԿ-ից:
«Ո՞վ է երազում նման բան տեսել, ո՞վ է ասում, որ Էդուարդ Մադաթյանը դուրս է եկել ՕԵԿ-ից»,- արձագանքեց Հեղինե Բիշարյանը:
