«Ժառանգություն» կուսակցության լրատվական ծառայությունից «Առաջին լրատվական»-ին տեղեկացնում են, որ մարտի 29-ին ժամը 11:30-ին Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում տեղի կունանա «Սզնի» ՍՊԸ տնօրեն, «Ժառանգություն» կուսակցության Վանաձորի ստորաբաժանման ղեկավար Գառնիկ Սահակյանի դատն ընդդեմ ՀՀ Ոստիկանության տնտեսական վարչության: Դատավորը Գայանե Կարախանյանն է:
Գործի նախապատմությունը հետևյալն է: ՀՀ Ոստիկանության Տնտեսական վարչությունը 2011թ. դեկտեմբերի 30-ին պաշտոնական նամակով ծանուցել է, որ «ՇՀԱՊՁԲ-11/4» ծածկագրով մրցույթի հանձնաժողովի կողմից 2011թ. դեկտեմբերի 20-ին անցկացված մրցույթի արդյունքների ամփոփման նիստում ընդունված որոշմամբ 130 չափաբաժնով մրցույթի հաղթող է ճանաչվել «Սզնի» ՍՊԸ-ն, որը վաստակել է 1272000 ՀՀ դրամի ծառայությունների կատարման իրավունք: Հաջորդ աշխատանքային օրը՝ 09.01.2012թ. սահմանված ժամկետներում «Սզնի» ՍՊԸ-ի տնօրենը ներկայացել է ՀՀ Ոստիկանություն` պայմանագիր կնքելու, սակայն նրան մերժել են անհիմն պատճառաբանությամբ, որից հետո Գառնիկ Սահակյանը դիմել է դատարան:
«Սզնի» ՍՊԸ-ի գնային առաջարկը եղել է 318 դրամ, սակայն պայմանագիր է կնքվել «Նյու Ինտերնեյշնլ Բիզնես Ֆարմ» ՍՊԸ-ի հետ 900 դրամով, տվյալ պահին պետությանը պատճառելով 2328000 դրամ գումարի վնաս: Տարօրինակ չէ, որ երբ «Ժառանգությունը» պահանջում է բարձրացնել նվազագույն աշխատավարձը, կենսաթոշակները, սոցիալական նպաստները` իշխանությունները հայտարարում են, որ պետբյուջեում փող չկա: Բյուջեում փող իրականում կա, պարզապես գործող իշխանությունը այն որպես կանոն նախատեսում է հիմնականում լվացման և սեփական հովանավորյալների գրպանը մտցնելու համար:
Հիշեցնենք, որ Գառնիկ Սահակյանը, լինելով «Սզնի» ՍՊԸ սեփականատեր` փոքր բիզնեսի այն եզակի ներկայացուցիչներից է, ով անհավասար պայքարի է բռնվել ՀՀԿ համամասնական ցուցակում ներգրավված Սամվել Ալեքսանյանին պատկանող «Նատալի Ֆարմ» ընկերության մենաշնորհի և վերջինի կողմից` դեղերի ներկրման և իրացման ոլորտում փոքր ու միջին բիզնեսի ոչնչացմանն ուղղված ապօրինի գործողությունների դեմ: Այդ պայքարում Գառնիկ Սահակյանը` «Ժառանգություն» կուսակցության խորհրդարանական խմբակցության աջակցությամբ հասել է շոշափելի հաջողությունների: Այսպես, խնդրի վրա հրավիրել է ՀՀ Տնտեսական մրցակցության պաշտպանության պետական հանձնաժողովի ուշադրությունը, որը «Նատալի Ֆարմի» դեմ վարույթ է սկսել, որը, սակայն անհասկանալի պատճառներով, անորոշ ժամանակով կասեցվել է այս տարվա մարտի կեսերին: Նա նաև շահել է մի շարք դատական հայցեր ընդդեմ այն բուժհաստատությունների, ովքեր ապօրինաբար մերժել են կամ խոչընդոտներ ու անհավասար պայմաններ են ստեղծել իր ձեռնարկատիրական գործունեության համար` հօգուտ «Նատալի Ֆարմի» և ոլորտի այլ արհեստական մենաշնորհների: Մասնավորապես, ս.թ. մարտի 22-ին Լոռու մարզի ընդանուր իրավասության դատարանը ամբողջությամբ բավարարեց Վանաձորի թիվ 1 հիվանդանոցի դեմ նրա հայցը:
Նշենք նաև, որ Գառնիկ Սահակյանը հարկադրված է թողնել ձեռնարկատիրական գործունեությունը և ընդգրկվել է «Ժառանգություն» կուսակցության համամասնական ցուցակի 13-րդ տեղում` Ազգային Ժողովում փոքր և միջին բիզնեսի շահերը օրենսդրորեն պաշտպանելու նպատակով:
