Եգիպտոսի ռազմական ոստիկանությունը 15 մարդու է ձերբակալել, ովքեր ուրբաթ և շաբաթ օրերին մասնակցել են Պորտ Սաիդ քաղաքում տեղի ունեցած անկարգություններին: Ինչպես հաղորդել է բանակի հրամանատարությունը, բոլոր ձերբակալվածներին կփոխանցեն ռազմական դատախազություն` մասնավոր և պետական սեփականության հանդեպ ոտնձգություն կատարելու մեղադրանքով:
Առավել դաժան բախումներ են տեղի ունեցել Պորտ Սաիդում ուրբաթ օրը, որոնք շարունակվել են մինչև շաբաթ օրվա վաղ առավոտ: Դրանք տեղի են ունեցել այն բանից հետո, երբ Եգիպտոսի ֆուտբոլի ֆեդերացիան կասեցրել է «Ալ-Մասրի» ակումբի՝ տեղական պրեմիեր-լիգայում մասնակցելու իրավունքը՝ հայտարարելով, որ այդ թիմի խաղացողները կարող են վերադառնալ ազգային առաջնություն միայն 2013-2014 թվականների սեզոնին: Բացի այդ, երեք տարով փակվել է քաղաքային մարզադաշտը: Նման պատժամիջոցներ կիրառվել են փետրվարի 1-ին տեղի ունեցած ողբերգությունից հետո, երբ «Ալ-Ահլի» մայրաքաղաքային ակումբի հետ ունեցած խաղից հետո զանգվածային ծեծկռտուքի հետևանքով մահացել էր ավելի քան 70 մարդ:
Ի պատասխան ԵՖՖ այդ որոշման՝ պորտսաիդյան ակումբի հազարավոր երկրպագուներ փողոց էին դուրս եկել և շարժվել դեպի Սուեզի ջրանցքի վարչություն՝ փորձելով այն գրավել: Սակայն նրանց կանգնեցրել են զինվորականները, ովքեր ստիպված են եղել կիրառել արցունքաբեր գազ, նռնակներ և ռազմական զենք: Ռազմավարական նշանակություն ունեցող ջրային այդ միջանցքի շենքը գրավելու ևս մեկ փորձ երկրպագուները կատարել էին նախօրեին` երեկոյան, սակայն բանակը կրկին նրանց գրոհը կասեցրել էր: Երկօրյա բախումների հետևանքով զոհվել է 13-ամյա դեռահաս, որը հրազենային վնասվածք էր ստացել, տուժել են նաև մոտ 100 եգիպտացիներ:
