Աշխարհի առաջատար երկրները «սև ոսկու» ներկրման վրա ընթացիկ տարում կծախսեն 1.5 տրլն դոլար: Համապատասխան կանխատեսմամբ հանդես է եկել Միջազգային էներգետիկ գործակալությունը: Այն հրապարակված է Financial Times-ի այսօրվա համարում:
Հաշվարկներն արվել են նավթի ընթացիկ գների ու այն պայմանների հիման վրա, համաձայն որոնց` դրանք ամսեամիս աճում են:
Միջազգային էներգետիկ գործակալության տվյալների համաձայն` ԵՄ երկրները նավթի ներկրման վրա կծախսեն 502 մլրդ դոլար` 2011թ. 472 մլրդ դոլարի դիմաց:
ԱՄՆ-ը 2012թ. ներկայիս շուկայական գներով կգնի 426 մլրդ դոլարի նավթ (380 մլրդ դոլար՝ 2011թ.), Չինաստանը` 251 մլրդ դոլար (215 մլրդ դոլար՝ 2011թ.), Ճապոնիան` 198 մլրդ դոլար (178 մլրդ դոլար՝ 2011թ.):
Միջազգային էներգետիկ գործակալության մասնագետների կարծիքով` նավթի գնման վրա կատարվող զգալի ծախսերը համաշխարհային տնտեսության համար կստեղծեն հավելյալ խնդիրներ` այն հասցնելով անկման:
