«Ժառանգություն» կուսակցության առաջնորդ Րաֆֆի Հովհաննիսյանն այսօր ասուլիսի ժամանակ խնդրեց առաջիկա խորհրդարանական ընտրություններին ընդառաջ՝ չջլատել ժողովրդի ուժերը, ինչպես, ըստ նրա, եղավ անցած տարի Ազատության հրապարակում:
Նա վստահեցրեց, որ երբ ինքը մեծամասնական ընտրակարգով իր թեկնածությունն է առաջադրել թիվ 7 ընտրատարածքում, չգիտեր, որ որպես այլընտրանք՝ այլ թեկնածու կա առաջադրված (նույն ընտրատարածքում են առաջադրվել նաև Սամվել Ալեքսանյանը և Նիկոլ Փաշինյանը-խմբ.):
«Ժամը հնչել է: Նրանք, ովքեր իրենց համարում են կուսակցություններ, դաշինք, պետք է նստեն մեկ սեղանի շուրջ և ողջամիտ եղանակով որոշեն, որ յուրաքանչյուր ընտրատարածքում մնա մեկ ընդդիմադիր թեկնածու»,- կոչ արեց Ր. Հովհաննիսյանը:
Պատրա՞ստ է արդյոք Հովհաննիսյանն իր թեկնածությունը հանել, եթե որոշվի Նիկոլ Փաշինյանի թեկնածությունը պահել, բանախոսի պատասխանը լակոնիկ էր` «ինչպես միշտ»: Առայժմ, սակայն, որևէ հանդիպում և քննարկում չի եղել:
«Ես հրաժարական չեմ տալու ՀՀ-ից և քաղաքականությունից»,- նշեց բանախոսը:
Անդրադառնալով ցուցակի նախնական հրապարակումից հետո «Ժառանգություն» կուսակցությունից վարչության քարտուղար Կարինե Հակոբյանի դուրս գալու հարցին` Ր. Հովհաննիսյանը նշեց, որ դա կորուստ է, և ինքը բարձր է գնահատում Կ. Հակոբյանի գործունեությունը՝ միաժամանակ կարևորելով այն, որ թեկուզ ուշ, բայց Հակոբյանն ուժ գտավ իր մեջ բացահայտելու, որ ավելի շատ հասարակական, քան քաղաքական գործիչ է:
