Հայաստանում ինտերնետ սպառողների սրընթաց աճ է գրանցվում

Հայաստանում ինտերնետից օգտվողների վերաբերյալ տվյալները միջազգային աղբյուրներում խիստ նվազեցված են: Այս կարծիքին է գլոբալացման ոլորտի հայաստանյան փորձագետ Անդրանիկ Գևորգյանը: Փորձագետի խոսքով` արտերկրում ցուցանիշները հիմնականում վերցվում են Internetworldstats-ի հաշվետվությունից, որն էլ հիմնվում է ITU-ի տվյալների վրա: Օրինակ, ITU -ի 2008 թ. տվյալների համաձայն` հայաստանյան ինտերնետ-սպառողների թիվը 191 հազար է, այսինքն` բնակչության 6,21 տոկոսը, լայնաշերտ ու բարձրարագ ինտերնետ սպառողների թիվը 5 հազար է` բնակչության 0,16 տոկոսը: Մինչդեռ հայ մասնագետները պնդում են, որ իրականում վերջին երկու տարում մենք սպառողների սրընթաց աճ ենք գրանցել: Ընդ որում, ընդլայնվել է լայնաշերտ ու բջջային ինտերնետը: ՀՀ հանրային ծառայությունները կարգավորող հանձնաժողովի վերջին հաշվետվությունը 2009 թվականինն է, համաձայն որի ինտերնետ ծառայություններից 2009 թվականի ընթացքում օգտվել է 1 227 474 բաժանորդ (այդ թվում` GPRS և 3G տեխնոլոգիաներով օգտվողները), ինչը 2008 թվականի համեմատությամբ աճել է մոտ 48%-ով: Բջջային կապի ցանցերով ինտերնետ ծառայություններից օգտվողների քանակը 2008 թվականի համեմատությամբ աճել է 50%-ով: 2009 թվականի 4-րդ եռամսյակում նախորդ տարվա նույն ժամանակահատվածի համեմատ 80%-ով աճել է լայնաշերտ ինտերնետ ծառայություններից օգտվող բաժանորդների քանակը: Ինչ վերաբերում է լայնաշերտ ինտերնետի սպառողների թվին, ապա 2008 թ. վերջին եռամսյակի համեմատությամբ` այն աճել է 7 անգամ` հասնելով 70-75 հազարի: Dial-up ինտերնետի աբոնենտների թիվը նվազել է 50 տոկոսով` հասնելով 40-45 հազար է, իսկ բջջային ինտերնետի աբոնենտների թիվը 1.5 մլն է: Սակայն փորձագետի խոսքով` հայկական տվյալներն էլ բավական ուռճացված են, քանի որ ունենք բնակչության մի շատ մեծ շերտ, որը նույնիսկ էլեկտրոնային փոստից օգտվել չգիտի, իսկ ինչ վերաբերում է բջջայիններին` շատերի դեպքում դրանցում նույնիսկ ինտերնետ հնարավորություններ չկան: Այնուհանդերձ, փորձագետի կանխատեսմամբ` առաջիկայում ևս ինտերնետից օգտվողների քանակական աճ կդիտվի, քանի որ բացի ինտերնետի էժանացումից, երկրում կոմպյուտերացումն էլ առաջընթաց է ապրում: