Թուրքական Radikal թերթի փոխանցմամբ՝ Թուրքիայում հետաքննություն է սկսվել Oda TV-ի գործով օրեր առաջ ազատ արձակված թուրք լրագրող Ահմեդ Շըքի հայտարարությունների պատճառով:
Վերջինս 375-օրյա ազատազրկումից հետո ազատ էր արձակվել այս տարվա մարտի 12-ին, որից հետո հայտարարել էր, որ այդ դավը նյութած ոստիկանները, դատավորներն ու դատախազները հայտնվելու են բանտում, և արդարությունը հաղթանակելու է: Նա հավելել էր, որ թուրքական բանտերում դեռ շարունակում են մնալ մոտ 100 լրագրողներ, սակայն խոսքի ազատության հարցը չի սահմանափակվում միայն լրագրողներով:
Ահմեդ Շըքի այս հայտարարությունները հետարքրել են Ստամբուլի հանրապետական դատախազությանը, որն էլ հետաքննություն է սկսել այդ կապակցությամբ: Առաջիկա օրերին Ահմեդ Շըքը ցուցմունքներ է տալու տվյալ խնդրի շուրջ:
Հիշեցնենք, որ Ահմեդ Շըքը ձերբակալվել էր 2011 թվականի մարտի 3-ին, իսկ դրանից երկու օր անց որոշվել էր նրան առնել կալանքի տակ: Մարտի 6-ին էլ նա ուղարկվել էր Մետրիսի բանտ՝ մեղադրելով «Էրգենեկոն» ահաբեկչական կազմակերպության անդամ լինելու մեջ:
Ահմեդ Շըքի ձերբակալությունից ընդամենը օրեր անց թուրքական ոստիկանությանը խուզարկություն էր իրականացրել Ստամբուլի «Իթհաքի» հրատարակչատանը` փնտրելու և կանխելու համար Ահմեդ Շըքի «Իմամի բանակը» խորագրով գրքի հրատարակումը: