Ռուսաստանում հայտնի ընդդիմադիր գործիչ, Ժողովրդի ազատության կուսակցության համանախագահ Բորիս Նեմցովը Պուշկինի հրապարակում ցույցի ընթացքում ցուցարարներին կոչ է արել բոյկոտել НТВ հեռուստաալիքը:
Պատճառը նախօրեին հեռուստաընկերության եթերով հեռարձակված «Բողոքի անատոմիա» ֆիլմն է, որը իբրև պատմում է ռուսական ընդդիմության շարքերում կաշառման դեպքերի մասին:
Այսօր Բ. Նեմցովը լրագրողներին հայտարարել է, որ միայն Մոսկվայում 1-2 մլն մարդ չի դիտի НТВ-ն, ինչի պատճառով էլ հեռուստաալիքը լուրջ կորուստներ կկրի: Նեմցովը հայտնել է նաև, որ արդեն Facebook-ում էջ է բացել, որը կոչվում է «Ես չեմ դիտում НТВ»:
Ընդդիմադիր քաղաքական գործիչը նաև նկատել է, որ НТВ-ում աշխատում են «լավ տղաներ», սակայն հեռուստաալիքի վարկանիշն ամբողջությամբ տապալված է: Ավելի վաղ նույնիսկ НТВ-ի լրագրողներն էին քննադատել ֆիլմը՝ այն անվանելով «քարոզչական ստեղծագործություն»:
Ֆիլմում НТВ-ի թղթակիցները իբր զրուցել են որոշ մարդկանց հետ, ովքեր շարունակաբար կազմակերպում են «մասովկա» միտինգների համար: Նրանց խոսքով` անհնար է գտնել իրական կազմակերպիչներին, քանի որ ամեն ինչ տեղի է ունենում միջնորդավորված կերպով:
НТВ-ով ցուցադրված ֆիլմը տառացիորեն պայթեցրել է բլոգոսֆերան: Ֆիլմի հեղինակների հասցեին հնչել են զայրացած բլոգերների կշտամբանքները` «НТВ-ն ստում է», «Կեղտոտ պատվեր», «Սուտ՝ НТВ-ի եթերում», «Անամոթներ», «Ֆիլմ, որը փորձում է վարկաբեկել այն մարդկանց, ովքեր կազմակերպել ու անցկացրել են Բոլոտնայա ու Սախարովի հրապարակներում միտինգները»:
