Պանամայի նախկին բռնակալ Մանուել Նորյեգայի մոտ հայտնաբերվել է գլխուղեղի բարորակ ուռուցք և հնարավոր է՝ անոթային անբավարարություն: Այս մասին հայտնել են մի խումբ բժիշկներ, որոնք իրականացրել են համապատասխան հետազոտություններ:
Բժիշկները փաստել են, որ նախկին բռնակալի կյանքը վտանգված է, իսկ բանտը, որտեղ նա գտնվում է, անհրաժեշտ սարքավորումներ չունի բուժումն իրականացնելու և անհրաժեշտության դեպքում բժշկական շտապ օգնություն ցուցաբերելու համար: «Այս վիճակը կարող է հանգեցնել հիվանդի վաղաժամ մահվան»,- ասել են բժիշկները:
Հիշեցնենք, որ Նորյեգան ձերբակալվել էր այդ երկիր ամերիկյան ներխուժման ժամանակ` 1990թ.-ին, իսկ 1992թ.-ին նրան դատապարտել էին 40 տարվա ազատազրկման` շորթման մեղադրանքով: Ավելի ուշ դատավճիռը փոխվել էր` դառնալով 17 տարի: Դրանից հետո Նորյեգային արտահանձնել էին Ֆրանսիա, որտեղ նրան դատապարտել էին 2,3 մլն եվրո «լվանալու» մեղադրանքով:
2011թ.-ից Նորյեգան գտնվում է Պանամայի բանտում, որտեղ նրան մեղադրում են 1985թ.-ին իր քաղաքական մրցակիցներից մեկին սպանելու մեջ: