Համահայկական նախաձեռնություններից հերթականը՝ «Համահայկական առևտրային ցանցը» (ՀԱՑ) ստեղծվեց անցած տարի ապրիլի վերջին: Սփյուռքի նախարարության նախաձեռնությամբ և Հայ-կանդական գործարար խորհրդի ու Հայաստանի առևտրաարդյունաբերական պալատի համատեղ ջանքերով կազմակերպված հիմնադիր խորհրդաժողովի մասնակիցներին ողջունեց ու ՀԱՑ-ի դերը կարևորեց նաև վարչապետ Տիգրան Սարգսյանը: ՀԱՑ-ի հիմնական առաքելությունը պետք է լիներ Հայաստան-Սփյուռք գործարար կապերի ամրապնդումը և ներդրումների ներգրավումը՝ հայրենիքի բարգավաճման նպատակով:
Ի՞նչ է արել այս մոտ մեկ տարվա ընթացքում ՀԱՑ-ը: Հրապարակային առումով՝ ոչինչ: Նույնն է նաև ներդրումների ներգրավման առումով՝ ոչ մի սփյուռքահայ առայժմ չի հայտարարել հայրենիքում բիզնես սկսելու մասին:
Սփյուռքի մամուլի և հասարակայնության հետ կապերի վարչությունից «Առաջին լրատվական»-ի հարցմանն ի պատասխան հայտնեցին, որ ստեղծվել է համակարգող խումբ, որը նախատեսում է համաժողով գումարել այս տարի աշնանը՝ Կանադայում:
Ընդ որում՝ նախարարությունից հաստատեցին մեր տեղեկությունները, որ ավելի վաղ որոշվել էր համաժողովն անցկացնել մայիսին Ղարաբաղում: Սակայն նկատենք, որ մինչ դա էլ համաժողովը որոշել էին անցկացնել Ֆրանսիայի Մարսել քաղաքում: Ու թեև «ճտերն աշնանն են հաշվում», սակայն չի կարելի պնդել, որ Կանադայում ՀԱՑ-ի համաժողովն այս տարվա աշնանն, այնուամենայնիվ, կկայանա:
Նախարարությունից մեզ նաև հայտնեցին, որ ՀԱՑ-ի նախագահությունը որոշվել է կազմակերպել ռոտացիոն կարգով՝ 2 տարին մեկ նախագահելու է որևէ երկրի ԱԱՊ: 2011 և 2012 թվականներին ՀԱՑ-ը նախագահում է Կանադայի ԱԱՊ-ն: Ընթացքի մեջ են ՀԱՑ-ի կայքի ստեղծման աշխատանքները:
