Աշխարհի վերջը՝ 2012-ի՞ն, թե՞ 2013-ին

13 Հունվար, 2011 16:27

Դիտումներ՝ *

Լրագրողների հետ հանդիպման ժամանակ աստղաբան, նկարիչ Գուրգեն Հովհաննիսյանը, խոսելով 2011 թ. սպասվող փոփոխությունների մասին, նշեց նաև, որ չպետք է վախենալ և ահաբեկվել վերջին տարիներին շրջանառվող այն լուրերից, թե իբր 2012 թ. աշխարհի վերջն է լինելու. «Բոլորը լսել են, որ, ըստ մայա ցեղերի օրացույցի, աշխարհի վերջը կլինի 2012 թ. դեկտեմբերի 24-ին, այդպիսի խոսակցություններ կային նաև 1999 թ., իբր օգոստոսի 11-ին կլինի աշխարհի վերջը, հետո 2000 թ. հետ կապված՝ արդեն տեխնոլոգիական առումով, սակայն ոչինչ էլ տեղի չունեցավ»:
Աստղաբանը նշեց, որ մայա ցեղի իսկական օրացույցի համաձայն, աշխարհի մեծ փուլը, մեծ անցումը կլինի 2013 թվականին. «Ըստ մայաների օրացույցի՝ 2013 թ. փետրվարի 18-ին կամ 19-ին տեղի կունենա այն մեծ փոփոխությունը, որը բոլորն «աշխարհի վերջ» են անվանում: Այս են հաստատում նաև NASA-ի որոշ տվյալներ։ Օրինակ՝ Ռիչարդ Ֆիշերը, որը Արեգակի դիտարկումների ղեկավարն է, պնդում է, որ արեգակնային ակտիվությունը առավել կուժեղանա հենց 2013-ին, և տեխնոլոգիական աղետները կշատանան: Այս մասին պնդում են նաև հնագույն քաղաքակրթությունները»:
Աստղաբանը բոլորին հանգստացնելով՝ ասաց, որ դա աշխարհի վերջը չէ, այլ նոր փուլի սկիզբ. «Պետք չէ վախենալ, քանի որ երկրագունդը իր պտույտը կշարունակի ևս մի քանի միլիարդ տարի, մարդիկ` նույնպես: Սակայն պետք է հաշվի առնել, որ երկրի մագնիսական դաշտերը սկսել են կտրուկ փոխվել և այդ փոփոխություներն իրենց ազդեցությունն են ունենում թե՛ բուսական, թե՛ կենդանական աշխարհի վրա, և վերջին օրերին թռչունների մեծ թվով անկումները նույնպես պայմանավորված են դրանով»: