Грузия Online-ի փոխանցմամբ՝ Վրաստանի նախագահ Միխեիլ Սաակաշվիլին Թել Ավիվում հանդիպել է տեղաբնակների հետ և իր ելույթում անդրադարձել է ռուս-վրացական հարաբերություններին.
«Վրաստանի բարգավաճումն ու վերածնունդը զայրացնում է մեր թշնամուն: Մեր թշնամուն մշտապես հայտնի է, թե որ կետին պետք է հասցնել հարվածը: Շահ Աբասը վերաբնակեցրեց կախեթցիներին և կտրել տվեց խաղողի այգիները: Ներկայիս Ռուսաստանը կարողացել է հասնել մինչև Աբխազիա ու Ցխինվալի շրջան:
Երբ Պուտինը դարձավ վարչապետ, նրա առաջին հակավրացական քայլը դարձավ մեր գինու ներկրման վրա բեռնարգելք դնելը: Թեև Ռուսաստանը ներխուժել է Վրաստան, այնուամենայնիվ նրան չհաջողվեց ընկճել Վրաստանը: Վրաստանը կարողացավ դիմանալ Ռուսաստանի սահմանած էներգետիկ ու տնտեսական շրջափակմանը:
Օրեր առաջ զավթիչ երկրի նոր-հին տիրակալը (Պուտինը) մեզ համար նշանակեց գլխավոր ճակատամարտի ժամկետն ու վայրը: Խոսքը հոկտեմբերին Վրաստանում կայանալիք խորհրդարանական ընտրությունների մասին է:
Վրաց ժողովուրդն անպայմանորեն կհաղթի այդ պայքարում: Մենք հաղթանակ կտանենք զավթիչի նկատմամբ, որը հանդիպում է նշանակել այս աշնանը: Աշնանը մենք կհանդիպենք Պուտինի հետ»:
Հիշեցնենք, որ մարտի 7-ին, պատասխանելով վրացական «Իմեդի» հեռուստաընկերության լրագրողի այն հարցին, թե հետագայում ինչպե՞ս են զարգանալու ռուս-վրացական հարաբերությունները, Պուտինը հարցին հարցով էր պատասխանել, թե ե՞րբ են Վրաստանում տեղի ունենալու ընտրությունները: Նա նաև Վրաստանի ղեկավարությանը մեղադրել էր Ռուսաստանի հետ խնդիրներ ստեղծելու մեջ:
