Դատարանի որոշմամբ բռնագրավվել է Լիբիայի նախկին առաջնորդ Մուամար Քադաֆիի որդու՝ Լոնդոնում գտնվող առանձնատունը: Այս մասին հայտնում է The Daily Telegraph թերթը:
15 միլիոն դոլար արժողությամբ տունը տեղակայված է Լոնդոնի ամենահարգի թաղամասերից մեկում` Հեմփսթեդում:
Տունը իբր պատկանում է բրիտանական Capitana Seas ընկերությանը, սակայն Լոնդոնի դատարանը պարզել է, որ կազմակերպության շահառուն Մուամար Քադաֆիի երրորդ որդի Սաադի Քադաֆին է:
Դատավորը, հայտնելով որոշման մասին, ընդգծել է, որ տունը ձեռք է բերվել անօրինական փողերով:
Ո՛չ 39–ամյա Սաադի Քադաֆին, ով գտնվում է Նիգերում, ո՛չ կազմակերպության ներկայացուցիչները դատարանում ներկա չեն գտնվել:
Դատական նիստի ժամանակ Լիբիայի նոր կառավարության ներկայացուցիչ, իրավաբան Մուհամմեդ Շաբաբը հայտարարել է, որ ներկայիս դատարանը ցույց է տալիս, որ ավարտվել է այն ժամանակաշրջանը, երբ բռնակալները և նրանց ընտանիքի անդամները պետական միջոցներն օգտագործում էին անձնական հարստություն դիզելու նպատակով։
Ենթադրվում է, որ եվրոպական այլ երկրներում ևս կստուգվեն արևելյան բռնապետներին պատկանող անշարժ գույքերը: