Թուրքական Dünya Bülteni կայքի փոխանցմամբ՝ Թուրքիայում սկսվել է 1960 թվականի մայիսի 27-ին և 1980 թվականի սեպտեմբերի 12-ին իրականացված ռազմական հեղաշրջումներին առնչվող արխիվային փաստաթղթերը համապատասխան հիմնարկներին վերադարձնելու գործընթացը:
Դրանք պատկանում են Թուրքիայի նախագահական և վարչապետական ապարատներին և Թուրքիայի Ազգային մեծ ժողովին (ԹԱՄԺ): Այդ փաստաթղթերն ու լուսանկարները տվյալ հեղաշրջումներից հետո տարվել են Թուրքիայի զինված ուժերի Գլխավոր շտաբի արխիվ:
Գլխավոր շտաբի պետ, բանակի գեներալ Նեջդեթ Օզելը հրահանգել է դասակարգել այդ փաստաթղթերը՝ ըստ դրանց հիմնարկային պատկանելության: Ակնկալվում է, որ այդ գործընթացը կավարտվի մինչև ամառվա վերջը: Ապա այդ փաստաթղթերը 2012 թվականի սեպտեմբերի 12-ից (ամենաարյունալի ռազմական հեղաշրջման 32-րդ տարելիցից) առաջ կուղարկվեն համապատասխան հիմնարկներ:
Նշվում է, որ վերադարձվելիք արխիվներում, որոնց մեծ մասը պատկանում է նախագահական ապարատին, առկա են նաև 1930-ական թվականներին տեղի ունեցած Դերսիմի ապստամբությանը և 1915 թվականի իրադարձություններին (Հայոց ցեղասպանություն) առնչվող բազմաթիվ փաստաթղթեր ու լուսանկարներ: Արխիվների վերադարձից հետո պատմաբաններն ու հետազոտողները կզբաղվեն դրանց քննությամբ:
