Հունվարի 14-23-ը Ծաղկաձորում կանցկացվի ձմեռային ճամբար, որը «Աղջիկների երկիր» շարժման հիմնում ՀՀ-ում» ծրագրի մասն է կազմում: Այս մասին լրագրողներին հայտնեց ծրագրի հեղինակ, ՀՀ երիտասարդ կանանց ասոցիացիայի նախագահ Լիլիթ Ասատրյանը: «Աղջիկների երկիր» շարժման հիմնում ՀՀ-ում» ծրագիրը, որը իրականացվում է ՀՀ ԿԳՆ-ի և ՀՀ-ում ԱՄՆ դեսպանության աջակցությամբ, մեկնարկել է 2010 թ. սեպտեմբերից և շարունակվելու է մինչև այս տարվա հունիս ամիսը: «Ծրագրի շրջանակներում անցկացվելու են նաև դասընթացներ, սեմինարներ, քննարկումներ ու հայտնի կանանց հետ հանդիպումներ»,- պատմում է Լ. Ասատրյանը: Այս ծրագրերի նպատակն է աղջիկներին տեղեկացնել իրենց իրավունքների ու քաղաքացիական պարտավորությունների մասին: 10-oրյա ձմեռային ճամբարին մասնակցելու են 7-ական աղջիկ բոլոր 10 մարզերից և Երևանից: «Հանձնաժողովը, հայտերը քննելով, ընտրել է 77 երեխայի, սակայն ճամբարին մասնակցելու համար ստացել ենք ավելի քան 200 դիմում, ուստի ծրագիրը շարունակական է լինելու»,-հայտնում է Լ. Ասատրյանը: