Վրաստանի նախագահ Միխեիլ Սաակաշվիլին հայտարարել է, որ ՌԴ հետ դիվանագիտական հարաբերությունները կարող են վերականգնվել այն ժամանակ, երբ ռուսական իշխանությունները
ճանաչեն Վրաստանի ինքնիշխանությունը նրա նախկին սահմաններում: Հիշեցնենք, որ ՌԴ ԱԳՆ-ն Վրաստանին առաջարկել էր վերականգնել դիվանագիտական հարաբերությունները:
«Ռուսաստանի հետ դիվանագիտական կապերը խզվեցին ինքնաբերաբար, երբ Ռուսաստանը դադարեց
Վրաստանին ճանաչել որպես ինքնիշխան պետություն: Այդ հարաբերություններն ինքնաբերաբար էլ կվերակագնվեն այն ժամանակ, երբ Ռուսաստանը կրկին ճանաչի Վրաստանն իր սուվերեն սահմաններով»,- Սաակաշվիլիի խոսքերը մեջբերել է
Interfax գործակալությունը:
Նախագահը հիշեցրել է, որ ՌԴ քաղաքացիների համար մուտքի անցագրային ռեժիմը Վրաստանը միակողմանիորեն է մտցրել` ելնելով ռուս քաղաքացիների շահերից, այդ թվում՝ նաև
ազգությամբ վրացի քաղաքացիների, որոնց թիվը
Ռուսաստանում քիչ չէ:
Սաակաշվիլին նաև հայտարարել է, որ վրացական
իշխանությունները պատրաստ են ՌԴ նախագահի հետ բանակցել հստակ թեմաների շուրջ: «Իհարկե, ներկայիս ռուսական իշխանությունները կարծում են,
որ մենք չպետք է խոսենք օկուպացման թեմայի շուրջ, բայց առանց այդ թեմայի մենք չենք կարող երկխոսել, քանի որ դա ինչպես մեր, այնպես էլ միջազգային հանրության համար կարևոր թեմա է»,- ասել է Սաակաշվիլին:
