Արևադաշտի գյուղապետի ընտրությունների արդյունքները այս պահի դրությամբ դեռևս ամփոփվում են։ Սակայն, ինչպես մեզ հետ զրույցում տեղեկացրեց Արմավիրի մարզպետարանի մամուլի քարտուղար Հերմինե Վարդանյանը, նախնական տվյալներով, առաջատար է Արևադաշտի գյուղապետի ժամանակավոր պաշտոնակատար Հովսեփ Օհանյանը։ Հարկ է նկատել, որ նա կուսակցական չէ, բայց համակրում է հանրապետական կուսակցությանը, իսկ այդ հանգամանքը մեզ հետ զրույցում մեկնաբանել էր հետևյալ կերպ։ «Ես կուսակցական չեմ, պարզապես կռված երկրապահ տղա եմ` մեդալներով, պատվոգրերով։ Հայրենիքի նվիրյալներից մեկը ես եմ։ Ճիշտն ասած՝ հանրապետական կուսակցությանը անդամագրվելու ցանկությունը առաջացավ վերջին շրջանում, բայց մտածեցի, որ անդամագրումս քաղաքական այլ երանգներ կստանա։ Սակայն իրականում եղել եմ այդ կուսակցության կողքին՝ որպես ազգի նվիրյալ, բարձրագույն կրթություն ունենալով՝ հասկանում եմ, որ այսօր իշխանության գլուխ ինքն ա, իսկ ես պարզ է, որ իշխանության գլուխ կանգնած մարդ եմ, և պատահական չէ, որ ձգտում եմ դրան։ 84 թվից աշխատել եմ ղեկավար պոստերում»։ Հիշեցենք, որ Արևադաշտի գյուղապետի մյուս թեկնածուն Արմավիրի մարզպետարանի աշխատակազմի ֆինանսական վարչության պետ Արամ Ղազարյանն է, որը պաշտոնապես հարում է հանրապետական կուսակցությանը։ Ինչևէ, ընտրությունների վերջնական արդյունքները և ընտրողների մասնակցության մասին ինֆորմացիան պարզ կլինի օրվա երկրորդ կեսին։