Մաշտոցի պուրակի ակցիան հեռու գնացող քաղաքական նպատակներ ունի: Այսօր լրագրողների հետ հանդիպմանը իր կարծիքը հայտնեց ԱԺ պատգամավոր Մանվել Բադեյանը` անդրադառնալով Մաշտոցի պուրակում տեղադրված կրպակների շուրջ բարձրացած բողոքի ալիքին: Նա նշեց, որ Մաշտոցի պուրակում բողոքի ակցիաները ունեն մի քանի շերտ և հեռու գնացող քաղաքական նպատակներ: Ըստ նրա` ակտիվիստների մի մասը ուղղորդվում է արտասահմանից, իսկ նպատակը Հայաստանում իրավիճակը ապակայունացնելն է:
«Մասնակիցների երկրորդ հատվածը իրոք բնապահպանական խնդիրներով մտահոգ մարդիկ են, իսկ երրորդ հատվածը` մարտնչող տգիտության գաղափարակիրները: Հիմնական զանգվածը` կազմակերպիչները, քողարկված են, կամավոր հանդես են գալիս մարտնչող տգետները, ովքեր իրենց մշակույթն են փորձում հաստատել Հայաստանում: Դա նույն ռաբիսն է:
Երկիրը քանդում են՝ ոչ ոք ոչինչ չասեց, իսկ բոլորը կառուցմանն են դեմ, հենց քարը քարի վրա է դրվում՝ հանդես են գալիս մարտնչող տգետները: Որևէ ծառ, որևէ թուփ չի տուժել Մաշտոցի պուրակում: Վերջապես ընդունվեց քաղաքական որոշում՝ այդ կրպակները Աբովյան փողոցից հանելու, իսկ այդ կրպակատերերը պետք է շարունակեն, չէ՞, իրենց բնակարանները պահել»,- նշեց Մ. Բադեյանը` հավելելով, որ Մաշտոցի պուրակն աղբանոցի նման մի բան է եղել:
Անդրադառնալով Մաշտոցի պուրակում ծրագրված «Հին Երևան» նախագծին` նա ասաց, որ ակցիայի մասնակիցների կողմից ծրագրի վերաբերյալ չեն եղել արձագանքներ, իսկ քաղաքապետը որոշել է մինչ այդ ծրագրի իրականացումը՝ տեղադրել այս կրպակները: Նա նշեց, որ Մաշտոցի պուրակում բնապահպանական խնդիրը շահարկվում է:
Նրա խոսքով` խառը իրավիճակից միշտ օգտվում են մարդիկ` ընդհուպ մինչև սատանիստները:
«Մենք պետք է սատանիստի ետևի՞ց գնանք, թե՞ քաղաքապետի: Սա ընդամենը գծած հարվածներ են, որոնք պետք է հասցվեն քաղաքի իմիջին: Ինչի՞ են ցանկանում հասնել: Մաշտոցի պուրակում 10 տոկոսն են ազնիվ մարդիկ, իսկ մնացածն ուղղորդված են: Ես չեմ կարող ասել, թե ովքեր են ուղղորդում»,- նշեց Մ. Բադեյանը` հավելելով, որ քաղաքականությունից կհեռանա, իր մանդատը վայր կդնի, եթե «Հին Երևան» ծրագրին զուգահեռ չքանդվեն այս կրպակները:
