Այս պահին Մաշոցի պուրակում Կենտրոնի ոստիկանության պաշտոնյաները բանակցում են Մաշտոցի պուրակի ակտիվիստների հետ: «Թռչկան» քաղաքացիական նախաձեռնության անդամ, իրավաբան Մերի Խաչատրյանը փորձում է Կենտրոնի փոխոստիկանապետ Արայիկ Պետրոսյանին և ոստիկանության Երևան քաղաքի վարչության պետի տեղակալ Ռոբերտ Մելքոնյանին բացատրել, որ շինարարությունը Մաշտոցի պուրակում անօրինական է, իսկ ակտիվիստների գործողությունները իրավաչափ են:
Փոխգնդապետ Մովսիսյանը Մերի Խաչատրյանին առաջարկում էր էլիտար կրպակների տարածքում հավաքված ակտիվիստներին առաջնորդել և դուրս բերել տարածքից, որից հետո իր միջնորդությամբ ժամանակավորապես կդադարեցվեն կրպակի շինարարական աշխատանքները:
Գնդապետ Ռոբերտ Մելքոնյանը ակտիվիստների հետ զրույցում նշեց, որ նրանց գործողությունները արդեն դուրս են եկել ինքնաբուխ կարգավիճակից, եթե այդպես շարունակվի՝ ոստիկանությունը համապատասխան միջոցներ կկիրառի, հնարավոր է՝ նաև նոր ոստիկանական ուժեր ավելանա:
Այս պահին էլ բանակցությունները դեռևս շարունակվում են:
Քիչ առաջ ակցիային միացան «Ժառանգություն» խմբակցության ղեկավար Րաֆֆի Հովհաննիսյանը և երգիչ Արամոն:
Ակտիվիստների շարքերը գնալով համալրվում են մտավորականներով, իրավապաշտպաններով։
