Մարտին ԱՊՀ Տնտեսական խորհուրդը կհաստատի մինչև 2020 թվականն ընկած ժամանակահատվածում ԱՊՀ մասնակից-պետությունների նորարար համագործակցության միջպետական ծրագրի օպերատորի մասին դրույթը: Ինչպես տեղեկացնում է «Մեդիամաքս» գործակալությունը, ծրագրի օպերատորի գործառույթները պետք է կատարի «Սկոլկովո» հիմնադրամը:
Փետրվարի 14-ին Մոսկվայի կառավարման դպրոցում (ՄԿԴ) կայացած հանդիպում-կոնֆերանսի ընթացքում նշվել է, որ «Սկոլկովո» հիմնադրամը զգալի սեփական միջոցներ ունի ոչ միայն պատրաստի նախագծերի ընտրման, մշակման և հետագա առևտրայնացման, այլև հեռանկարային գաղափարների ընտրության համար:
«Սկոլկովո» հիմնադրամի փոխնախագահ Ստանիսլավ Նաումովն ասել է, որ «Սկոլկովո»-ում ձևակերպված ընկերությունները կստանան հարկման զրոյական ռեժիմ, ներկրված սարքավորումների մաքսատուրքերի 100%-անոց փոխհատուցում, ինչպես նաև ներգաղթի օրենսդրության պարզեցված ռեժիմ՝ այս ամենը մոտակա 10 տարիների համար: Հիմնադրամը նաև ապահովում է ԱՊՀ երկրների տարածքում գիտատեխնիկական հետազոտությունների մեխանիզմների առևտրայնացումը:
«Մենք պատրաստ ենք յուրաքանչյուրիդ համար օպերատոր լինել, այսինքն` այն աշխատող գործիքը հանդիսանալ, որը խնդիրներ կլուծի` կրթության, գիտական հետազոտությունների, տնտեսության ոլորտներում»,- ասել է Ս. Նաումովը՝ դիմելով ծրագրի մասնակից-պետությունների ներկայացուցիչներին:
Այսօրվա դրությամբ «Սկոլկովո» հիմնադրամն արդեն աջակցում է 350 նորարարական ընկերությունների, որոնցից շուրջ 80-ը Մոսկվան են ներկայացնում, 50-ը Սանկտ Պետերբուրգից են, իսկ մնացածը ներկայացնում են Ռուսաստանի 30 մարզերը:
«Այս տարի մենք ցանկանում ենք ընկերությունների թիվը 500 հասցնել, սակայն, իրականում, կարծում եմ, թիվն ավելի մեծ կլինի»,- ընդգծել է «Սկոլկովո»-ի ներկայացուցիչը:
Նորարարական նախագծերի աջակցության նպատակով «Սկոլկովո»-ն կարող է սեփական վենչուրային հիմնադրամներ ստեղծել և միջոցներ ներգրավել զարգացման այլ ինստիտուտներից:
«Սկոլկովո» հիմնադրամի ներդրումային ծառայության ղեկավար Ալեքսանդր Լուպաչովն ասել է, որ հիմնադրամն ԱՊՀ մասնակից-երկրների ընկերություններից նորարական կենտրոնին անդամակցելու ավելի քան 20 դիմում է ստացել, մեկ դիմում՝ ուղղված Կենսաբժշկական տեխնոլոգիաների Կլաստերը, արդեն ստացել է փորձագիտական խորհրդի հաստատումը:
«Սկոլկովո» հիմնադրամը 2012թ. դիտարկում է իր ներկայացուցչության բացման հնարավորությունը ԱՊՀ մասնակից-երկրներից մեկում («Սկոլկովո»-ի ներկայացուցչություններ արդեն բացվել են ԱՄՆ Սիլիկոնային հովտում և Իսրայելում):
Այսօրվա դրությամբ հիմնադրամն ավելի քան 80 ընկերություն է ֆինանսավորել, իսկ, ընդհանուր առմամբ, նորարարական քաղաքի տարածքում ավելի քան 1 000 ստարտափներ կզարգանան: Դրանցից ավելի քան 20%-ը միջազգային գործընկերներ և ներդրողներ ունեն:
«Սկոլկովո»-ին կից հավատարմագրված են 28 վենչուրային հիմնադրամներ, այդ թվում 8 արտասահմանյան` ավելի քան 360 մլն դոլար ընդհանուր գումարով:
