Հայաստանը պատրաստ է ընդունել Սիրիայից փախստականների: Այսօր «Առաջին լրատվական»-ի հետ զրույցում նման տեսակետ հայտնեց Հայաստանի տարածքային կառավարման նախարարությանն առընթեր Միգրացիոն գործակալության պետ Գագիկ Եգանյանը`պատասխանելով այն հարցին, թե Հայաստանը պատրա՞ստ է ընդունել նրանց, ովքեր կորոշեն ժամանել Սիրիայից:
Նա նշեց, որ Հայաստանը պատրաստ է ընդունել ոչ միայն հայերի, այլև Սիրիայի բնակիչներին, քանի որ ՀՀ օրենսդրությունը թույլ է տալիս: Ըստ նրա` եթե որևիցե մի երկրում անձի կյանքին վտանգ է սպառնում՝ քաղաքական անկայուն վիճակի, հակամարտությունների և այլ նմանատիպ պատճառներով, ՀՀ-ն պատրաստ է նրանց տրամադրել ապաստան: «Այսինքն` Հայաստանում բնակության իրավունք, նրանց չենք վերադարձնի նրա կյանքին սպառնացող վայրը, մի շարք բնագավառներում որոշակի իրավունքներ կտրվեն: Այդ համակարգը 2000 թ. ի վեր գործում է Հայաստանում և իր կայացման ճանապարհին մի քանի կարևոր հանգրվաններով է անցել և ցույց է տվել, որ իրոք կայացած է ու արդյունավետ:
Հանգրվան առաջին` իրաքյան հակամարտություն. 2002 թ. 1000-ից ավելի փախստականներ են դիմել մեզ և այս համակարգով ստացել ապաստան: Երկրորդ հանգրվան` լիբանանյան կոնֆլիկտ. այդ ժամանակ հակամարտող երկու երկրների քաղաքացիներ Հայաստան եկան պաշտպանություն գտնելու համար: 2008 թվական՝ վրաց-օսեթական պատերազմ»,- նշեց Գ. Եգանյանը`հավելելով, որ մարդկանց տեղավորում են պետական ոչ առևտրային կազմակերպությունում, որը պետական հոգածության ներքո է լինում:
Այն հարցին, թե Հայաստանը ինչքա՞ն մարդ կարող է ընդունել, պատասխանեց, որ եթե մեծ թիվ լինի, անշուշտ շատ վատ վիճակ կարող է ստեղծվել: «Այդ ժամանակ, որպես կանոն, միջազգային հանրությունն է օժանդակության ձեռք մեկնում: Ամեն ինչ պայմանավորված է ծավալներից»,- մեկնաբանեց Գ. Եգանյանը:
