Հոլիվուդյան հայտնի ռեժիսոր Սթիվեն Սփիլբերգը նոր ֆիլմ կնկարահանի Մովսես մարգարեի մասին: Ինչպես հաղորդում է Deadline կինոռեսուրսը, «Աստվածներ և թագավորներ» ֆիլմում մարգարեն հանդես կգա խիզախ մարտիկի դերում, որն ազատում է իր ժողովրդին:
Ֆիլմի նկարահանումները կկատարի Warner Bros կինոստուդիան, որն էլ հենց առաջարկել է Սփիլբերգին աշխատել ֆիլմի վրա:
Ավելի վաղ նոր ֆիլմի ռեժիսորի դերում ուսումնասիրվում էր Դարեն Արանոքսկու թեկնածությունը: Սակայն վերջինս զբաղված է Նոյի մասին ֆիլմի էկրանավորմամբ և հրաժարվել է նոր նախագծին մասնակցելուց: Ֆիլմի պրոդյուսերներն են Դեն Լինը և Մաթի Լեշեմը, սցենարի հեղինակները՝ Մայքլ Գրինը և Սթյուարտ Հեզելդայնը:
Սփիլբերգի թիմը կփորձի ներկայացնել Մովսեսի կյանքը՝ Նեղոսի ափին փրկությունից մինչև Սինա լեռան վրա պատվիրաններ ստանալու պահը: Ֆիլմի հեղինակները նշում են, որ այն կնկարահանվի ռազմական դրամայի ոճով և կհիշեցնի «Խիզախ սիրտը»:
Ֆիլմի նկարահանումները կսկսվեն 2013 թ. գարնանը:
