Ճապոնական Toyota Motor Corp. ավտոկոնցեռնը, որը վերջին մի քանի տարիների ընթացքում համարվում էր աշխարհում խոշորագույն ավտոարտադրողը, 2011 թվականի տվյալներով կորցրել է իր առաջատարությունը: Տարերային աղետի պատճառով արտադրության մի մասը կաթվածահար եղավ Ճապոնիայում, այնուհետև Թաիլանդում, ընկերությունը հետ է մնացել ոչ միայն իր մրցակից ամերիկյան GM, այլ նաև գերմանական Volkswagen ընկերությունից:
Ինչպես հայտնում է РБК-ն, 2011 թվականի արդյունքներով, Toyota-ի վաճառքը ընկել է 6 տոկոսով` մինչև 7.95 միլիոն ավտոմեքենա, իսկ դուստր Daihatsu և Hino ընկերություններինը` մինչև 7.1 միլիոն ավտոմեքենա: Ընդ որում՝ 2011 թվականին GM-ի վաճառքը ամբողջ աշխարհում հասել է 9.03 միլիոն ավտոմեքենայի, իսկ Volkswagen-ինը` 8.16 միլիոնի:
Ճապոնական ավիակոնցեռնի վերջին կանխատեսումների համաձայն՝ նրա մաքուր շահույթը կրճատվել է 56 տոկոսով և կազմում է 180 միլիարդ յեն (2,32 միլիարդ դոլար): Նախապես ենթադրվում էր, որ այս ցուցանիշը լինելու է 390 միլիարդ յեն (5 միլիարդ դոլար): Թաիլանդի ջրհեղեղների պատճառով Toyota-ն չի ստանա 120 միլիարդ յեն օպերացիոն շահույթ (1,55 միլիարդ դոլար), ևս 190 միլիարդ յեն (2,45 միլիարդ դոլար) ընկերությունը կորցնելու է չափազանց ամուր ազգային արժութի պատճառով, որը «կլանում է» արտահանման եկամուտը:
Ճապոնական ընկերությունը չի հանձնվելու և մտադիր է վերադարձնել համաշխարհային առաջատարի դերը: Այսպես, 2012 թվականին Toyota-ն հույս ունի զգալիորեն մեծացնել ավտոմեքենաների վաճառքը:
