Եթե անգամ Հայ ազգային կոնգրեսի ներկայացուցիչ Սասուն Միքայելյանն ընտրվի Հրազդանի քաղաքապետի պաշտոնում, ապա ՀԱԿ-ը, միևնույն է, դժգոհելու մի բան կգտնի: «Առաջին լրատվական»-ի հետ զրույցում նման տեսակետ հայտնեց փորձագետ Մանվել Սարգսյանը:
«Ընդդիմությունից ինչ-որ մեկը մինչև հիմա ասե՞լ է, որ խորհրդարանական ընտրություններն ազատ կանցնեն: Միշտ էլ հակառակ հայտարարություններ են արվել, և եթե ուրիշ հայտարարություններ արվեին, ընդդիմությունը պետք է հասարակությանն ինչ-որ կերպ բացատրեր իր դիրքորոշման փոփոխությունը: Եթե ընդդիմությունն ասի, որ վիճակը փոխվել է, դրա համար պետք է բացատրություններ տա»,- նկատեց փորձագետը:
Ամփոփելով՝ Մանվել Սարգսյանը նշեց, որ քաղաքական դաշտի գրեթե բոլոր կուսակցությունների՝ վերջին շրջանի հայտարարությունները բավական անհասկանալի ու իրարամերժ են: «Բոլոր կուսակցությունները կոչ են անում մասնակցել ընտրություններին, բայց միաժամանակ բոլորն անխտիր ասում են, որ ընտրությունները կեղծվելու են»,- ասաց փորձագետը:
