«Ազատություն» ռադիոկայանի փոխանցմամբ, պաղեստինյան «Համաս» խմբավորումը այսօր «ֆարս» և «ժամանակի վատնում» է որակել իսրայելցի և պաղեստինցի բանակցողների՝ երեկ Հորդանանում կայացած հանդիպումը։
Վերջին 16 ամիսների ընթացքում իսրայելա-պաղեստինյան առաջին հանդիպումը՝ նվիրված խաղաղ բանակցությունները վերսկսելու ուղիների քննարկմանը, ըստ «Համաս»-ի խոսնակ Ֆավզի Բարհումի, հակասում է իրենց ժողովրդի հույսերին և իղձերին։
Ռադիոկայանը հիշեցնում է, որ հանդիպման արդյունքում, որին մասնակցել են նաև Հորդանանի պաշտոնյաները և Մերձավոր Արևելքում խաղաղ գործընթացի միջնորդ քառյակի՝ Միացյալ Նահանգների, Եվրամիության, Ռուսաստանի և ՄԱԿ-ի նեկայացուցիչները, որևէ ճեղքում չի արձանագրվել։
Գազայի հատվածը վերահսկող «Համաս»-ը հրաժարվում է ճանաչել Իսրայելը և ընդդիմանում է հրեական պետության հետ խաղաղության հաստատման՝ Պաղեստինի նախագահ Մահմուդ Աբասի նախաձեռնություններին։
