2012 թ. հայ-վրացական հարաբերությունները նախագահները կօգտագործեն իրենց նախընտրական քարոզարշավի համար. «Առաջին լրատվական»-ի հետ զրույցում, քննարկելով հայ-վրացական հարաբերությունների զարգացումներն, այս մասին ասաց Թբիլիսիի հայերի ասամբլեայի ղեկավար Առնոլդ Ստեփանյանը:
Նա կարծում է, որ արդեն առաջիկա ամիսներին կսկսվի այն պայմանավորվածությունների իրականացումը, որ հաստատվել են երկու երկրների կառավարությունների միջև: «Դա վերաբերում է սահմանի հատման գործընթացի դյուրացմանը և, ինչպես ինձ հայտնի է, առաջին քայլն արդեն մարտ ամսին է նախատեսվում: Կլինի նաև տնտեսական հարաբերությունների խորացում, որն առաջին հերթին կարևոր է ճնշման թուլացման համար: Երկու երկրները հետաքրքրություններ ունեն իրար հանդեպ, և տնտեսությունն այդտեղ մեծ դեր ունի»,- մեկնաբանեց Ա. Ստեփանյանը` հավելելով, որ քաղաքական դաշտում հարաբերություններն այնքան ակտիվ չեն լինի, ինչքան անցյալ տարի, քանի որ երկու երկրներում սպասվում են խորհրդարանական ընտրությունները. իշխանությունները զբաղված են լինելու ներքաղաքական խնդիրներով: Նա նաև կանխատեսում է, որ ռուս-վրացական հարաբերությունների սրացում չի լինի:
Առնոլդ Ստեփանյանը ընդգծեց, որ հայ-վրացական հարաբերությունները կայուն զարգացման ուղով կշարժվեն, և հայ-վրացական հարաբերությունների հիմնական զարգացումը տեղի կունենա տարեվերջին, երբ ավարտված կլինեն ընտրությունները և՛ Հայաստանում, և՛ Վրաստանում:
«Այն, որ Հայաստանը հետաքրքրված է հայ-վրացական տնտեսական հարաբերությունների բարելավմամբ՝ փաստ է: Հայ-վրացական հարաբերությունները կօգտագործվեն երկու երկրների նախագահների քարոզարշավում: Իսկ հաջորդ տարի ավելի ակտիվ կզարգանան այդ հարաբերությունները»,- ամփոփեց Թբիլիսիի հայերի ասամբլեայի ղեկավար Առնոլդ Ստեփանյանը:
