Գալիք Նոր տարում ցանկանում եմ, որ ավելի շատ լուծվեն սոցիալական խնդիրները: Առողջություն եմ ցանկանում, ցանկանում եմ, որ մեր երկրում ոչ ոք սոցիալական խնդիր չունենա:
«Առաջին լրատվական»-ի հետ զրույցում, շնորհավորելով հայ ժողովրդի ամանորյա տոները, նման բարեմաղթանք հղեց երգիչԱրամոն:
Երգիչը ցանկանում է, որ գալիք տարում յուրաքանչյուրն աշխատանք ունենա, մեծահասակները` հանգիստ ու ապահով ծերություն:
«Ուզում եմ, որ նրանք ապահով տեսնեն իրենց վաղվա օրը: Ցանկանում եմ, որ գա օր, որ առավոտից եռուզեռ լինի քաղաքում, որ թախծոտ ու տխուր անպաշտպան աչքեր չտեսնեմ»,- ասաց Արամոն:
«Ուզում եմ, որ մարդիկ լիաթոք վայելեն այն կյանքը, որ Աստված պարգևել է իրենց, չեմ ուզում մարդկանց ընկճված տեսնել, ցանկանում եմ, որ մեր պետությունը հզորանա:
Մենք ունենք գերբ, դրոշ, հիմն: Արդեն 20 տարեկան տղամարդ է մեր երկիրը ու տղամարդու պես պետք է գլուխը բարձր պահի»,- ցանկացավ երգիչը:
Նա մաղթեց, որ գալիք տարում ծնելիությունը բարձրանա ու ծնվեն նոր Սևակներ, Փելեշյաններ, Շիրազներ, Ռուբեն Մամուլյաններ, Մինասներ, որոնք «կփայփայեն այն հողը, որի վրա ծնվել են»:
Լուսանկարը` Bravo.am
