«Մե՛նք ենք այս քաղաքի տերը» քաղաքացիական նախաձեռնությունը տագնապով փաստում է, որ Երևան քաղաքում Նոր տարվա շեմին փորձ է արվում բազմաթիվ նոր կառուցապատումներ սկսել:
«Մասնավոր ընկերությունները, ստանալով որոշակի պաշտոնյաների հովանավորություն, սկսել են հիմքերի համար փոսեր փորել` քաղաքացիներին այնուհետև փաստի առջև կանգնեցնելու նպատակով: Դա վերաբերվում է ինչպես Նալբանդյան 106, Աբովյան 3/1, Բյուզանի 39 հասցեներին, այնպես էլ մի շարք այլ շինարարական նախագծերին, որոնք ընթացքի մեջ կամ նախապատրաստական փուլում են»,- հայտարարում են նախաձեռնության անդամները:
«Մե՛նք ենք այս քաղաքի տերը» քաղաքացիական նախաձեռնությունը զգուշացնում է բոլոր քաղաքացիներին, որ եթե տոների ընթացքում նման շինարարությունները շարունակվեն, ապա պաշտոնյաների լավ ցանկությունները միայն ձևական բնույթ են կրում:
Նորից շեշտում ենք, որ բեմականացված քննարկումներին պետք է փոխարինի իսկական քննարկում Երևանի բնակիչների հետ ցանկացած կառուցապատում իրականացնելուց ամիսներ առաջ:
«Թե՛ ընկերությունների, թե՛ պատասխանատուների նման գաղտագողի գործելաոճը խոսում է միայն բավարար կամքի բացակայության մասին: Արդեն այսօր Երևանը կորցնում է իր քաղաքային մշակույթը և դառնում անկանոն կառույցների և մարդու կյանքի համար վտանգավոր մի տարածք:
Մոտենում է Ամանորը:
Թո՛ղ որ 2012թ. Երևանի բնակիչներն ապրեն առավել կանաչ, իրենց երեխաների համար առավել առողջարար և հանրային քաղաքում»,- նշված է «Մե՛նք ենք այս քաղաքի տերը» քաղաքացիական նախաձեռնություն հաղորդագրության մեջ։
