Ֆրանսիայում ընդունված օրինագիծը մեծ թափ կտա Ցեղասպանության միջազգային ճանաչման և դատապարտման գործընթացին: «Առաջին լրատվական»-ի հետ զրույցում նման տեսակետ հայտնեց թուրքագետ Ռուբեն Սաֆրաստյանը`խոսելով այսօր Ֆրանսիայի ԱԺ-ում ընդունված Հայոց ցեղասպանության հերքումը քրեականացնող օրինագիծի շուրջ։ Ռ. Սաֆրաստյանի համոզմամբ, Ֆրանսիան ընդունեց մի օրենք, որը բխում է եվրոպական արժեքներից:
«Թուրքիան, որը ձգտում է եվրոպական միության անդամ դառնալ և եվրոպական երկրների մաս կազմել, ժխտում է պատմական իրականությունը: Ես համարում եմ, որ Թուրքիայի համար առաջին հերթին ճանապարհ է ցույց տրվում, թե ինչպես պետք է առաջ շարժվել, եթե ցանկություն ունի Եվրոպայի մաս կազմել: Անդրադառնալով Ցեղասպանության ճանաչման գործընթացին` ասաց, որ մեծ թափ կստանա ճանաչման և դատապարտման գործընթացը: Նա մեկնաբանեց, որ մեկ անգամ ևս պարզ է դառնում, որ այս օրենքն ուղղված է այն մարդկանց, այն երկրներին, որոնք կեղծում են պատմությունը:
«Այս օրենքն ուղղված է նաև պատմական անցյալը ճանաչելուն, այն դեպի ապագան է ուղղված և այս առումով կարևոր է, որովհետև մարդկությունն այս օրենքով մեկ քայլ առաջ կատարեց` մասնավորապես Եվրոպան և Ֆրանսիան, դեպի այնպիսի հասարակություն, որտեղ ցեղասպանությունները ոչ միայն օրենքով են արգելված, այլև հնարավոր չէ, որ կատարվեն»,- մանրամասնեց թուրքագետը`մեծ կարևորություն և նշանակություն տալով օրինագծին: Ըստ Ռ. Սաֆրաստյանի` առաջին հերթին կարևոր է, ելնելով այն բանից, որ խոսքը գնում է եվրոպական արժեքների մասին: «Այն արժեքների մասին, որի վրա հիմնվում է Եվրոպան: Ֆրանսիան օրինակ է ծառայում մյուս եվրոպական երկրներին: Սա այն ճանապարհն է, որը մարդկությունը պետք է անցնի»,- ամփոփեց թուրքագետը`հավելելով, որ առաջինն այդ ճանապարհն անցավ Ֆրանսիան:
Նշենք, որ այսօր Ֆրանսիայի խորհրդարանն ընդունեց Հայոց ցեղասպանության հերքումը քրեականացնող օրինագիծը։ Օրինագծով նախատեսվում է Ֆրանսիայում Հայոց ցեղասպանությունը հերքողներին պատժել մեկ տարի ազատազրկմամբ ու 45,000 եվրո տուգանքով։ Օրինագիծը 2012թ. մարտին կքննարկվի Վերին պալատում՝ Սենատում։
