Եգիպտոսի մայրաքաղաք Կահիրեում Զինված ուժերի բարձրագույն խորհրդի դեմ տեղի ունեցած ցույցերը վերածվել են զանգվածային անկարգությունների, որի հետևանքով զոհվել է 6, վիրավորվել 255 մարդ:
Ինչպես հաղորդում է Reuters գործակալությունը, անկարգությունները դեռ չեն դադարել, ցուցարարների շարքերը համալրվում են նոր մարդկանցով: Ցույցերի կենտրոնը կառավարության և խորհրդարանի շենքերն են, որոնց դիմաց արդեն շուրջ 3 շաբաթ տասնյակ ցուցարարներ նստացույց են անցկացնում՝ պահանջելով երկրի զինվորական իշխանությունների անհապաղ հրաժարականը:
Ոստիկանության և բանակի հետ ընդհարումներն սկսվել են այն բանից հետո, երբ համացանցում տարածվել է մի տեսագրություն, որում ոստիկանները դաժանորեն ծեծում են ձերբակալված ցուցարարներից մեկին: Դրանից հետո ակցիայի մասնակիցները սկսել են քարեր նետել ոստիկանների վրա:
Այս ամենի հետևանքով հերթական անգամ երկրում իրավիճակը դուրս է եկել վերահսկողությունից:
Հաղորդվում է, որ զոհերի թվում է բարձրաստիճան հոգևորական: Վիրավորների մեջ կան տասնյակ զինծառայողներ: Նշվում է, որ անհանգստություն է նկատվում նաև Ալեքսանդրիայում:
