Շատ բեղուն ու լեցուն տարի էր Երևանի Մնջախաղի պետական թատրոնի համար: Թատրոնը 3 ներկայացմամբ օգոստոսին մասնակցել է Շվեյցարիայի Ցյուրիխ քաղաքում անցկացվող Հայաստանի 20-ամյակին նվիրված «Հայկական փառատոն» միջոցառմանը: Այս մասին «Առաջին լրատվական»-ի հետ զրույցում, ամփոփելով անցնող տարվա ձեռքբերումները, ասաց Մնջախաղի պետական թատրոնի գեղարվեստական ղեկավար Ժիրայր Դադասյանը:
Մեզ հետ զրույցում նա տեղեկացրեց, որ նոյեմբերի 20-ին Մոսկվայում կայացած ինտերնետ փառատոնի արդյունքների ամփոփման ժամանակ 1-ին մրցանակին արժանացել է Մնջախաղի թատրոնի «Մագաղաթ» ներկայացումը, իսկ մեկ այլ անվանակարգում` երևանյան «Միմ ստուդիայից» Արայիկ Հարությունյանը մրցանակի է արժանացել սոլո ժանրում:
Նույն փառատոնի ժամանակ, Ժ. Դադասյանն ուրախությամբ նշեց, որ շնորհված 3 պատվո մեդալներից մեկը տրվել է դարձյալ Երևանի մնջախաղի պետական թատրոնին:
«Մնջախաղի արվեստին երկարատև և անբասիր ծառայության և ակնառու հաջողությունների համար» թատրոնն արժանացել է «Մարսել Մարսո և Ժան Լուի Բարո» ոսկե մեդալի:
