Մեծ Բրիտանիայում գործազրկությունը 2011 թ. օգոստոս-հոկտեմբերին հասել է 17 տարվա մեջ ամենաբարձր մակարդակի՝ 8.3 %-ի: Այսպիսի թվեր է ներկայացնում երկրի Ազգային վիճակագրական վարչությունը:
Ինչպես հաղորդում է Интерфакс գործակալությունը, Մեծ Բրիտանիայում գործազուրկների թիվը 3 ամսում ավելացել է 128 հազարով՝ հասնելով 2.64 միլիոնի:
Տնտեսագետները նշում են, որ առաջիկայում բրիտանական ընկերությունները կարող են սկսել ավելի քիչ թվով մարդկանց գործի ընդունել՝ կապված մայրցամաքի պարտքային ճգնաժամի և համաշխարհային տնտեսության տեմպերի թուլացման հետ:
Կառավարության կանխատեսումներով, Մեծ Բրիտանիայում գործազրկության մակարդակը իր գագաթնակետին՝ 8,7%-ի կհասնի 2012 թ., որից հետո կսկսի նվազել:
Նոյեմբերին հաղորդվում էր, որ երկրում գործազուրկ երիտասարդների թիվը հասել է վերջին 19 տարիների ընթացքում ռեկորդային մակարդակի: Այժմ մեծ Բրիտանիայում գործազուրկ է համարվում 16-24 տարեկան 1.02 մլն երիտասարդ: Դա կազմում է երկրի աշխատունակ բնակչության 21.9%-ը:
