Դեկտեմբերի 9-12-ին Արգենտինայի վերընտրված նախագահ Քրիստինա Ֆերնանդես դե Կիրչների պաշտոնի ստանձնման հանդիսավոր արարողությանը մասնակցելու նպատակով աշխատանքային այցով Բուենոս Այրեսում էր մեկնել ՀՀ ԱԳ նախարարի տեղակալ Աշոտ Հովակիմյանը:
ՀՀ ԱԳՆ մամլո գրասենյակից «Առաջին լրատվական»-ին տեղեկացնում են, որ դեկտեմբերի 9-ին Ա. Հովակիմյանը և ՀՀ դեսպան Վլադիմիր Կարմիրշալյանը մասնակցել են նաև Բուենոս Այրես քաղաքի կառավարության վերընտրված ղեկավար Մաուրիսիո Մակրիի երդմնակալության կապակցությամբ կազմակերպված ընդունելությանը և կարճատև զրույց ունեցել նրա հետ:
Դեկտեմբերի 10-ին ՀՀ ԱԳ փոխնախարարն ու ՀՀ դեսպանը մասնակցել են նախագահ Քրիստինա Ֆերնանդես դե Կիրչների երդմնակալության արարողությանը: Աշոտ Հովակիմյանը Արգենտինայի նախագահին է փոխանցել Հայաստանի Հանրապետության նախագահ Սերժ Սարգսյանի շնորհավորանքներն ու բարեմաղթանքները:
Դեկտեմբերի 11-ին փոխնախարար Աշոտ Հովակիմյանն այցելել է Բուենոս Այրեսի Սուրբ Գրիգոր Լուսավորիչ Մայր տաճար, Հայ առաքելական եկեղեցու առաջնորդարանում հանդիպել արգենտինահայ համայնքային կառույցների ղեկավարների հետ:
ՀՀ ԱԳ փոխնախարարը դեկտեմբերի 12-ին Արգենտինայում ՀՀ դեսպանությունում աշխատանքային հանդիպում է ունեցել դեսպանության անձնակազմի հետ:
