Ռուսական ВЗГЛЯД թերթի փոխանցմամբ՝ այսօր վրացական «Ալիա» թերթը գրել է, որ այս տարվա դեկտեմբերի 2-ին Վրաստանի նախագահ Միխեիլ Սաակաշվիլիի կողմից վրացական բանտում պահվող իսրայելցի երկու գործարարներին՝ Ռոնի Ֆուքսին ու Զեև Ֆրենկելին, վրացական իշխանությունները համաներելուց առաջ նրանց ազատարձակման համար առաջարկել են 140 միլիոն դոլարով գնել Թբիլիսիի Ռուսթավելի պողոտայում գտնվող Վրաստանի խորհրդարանի շենքը (Վրաստանի խորհրդարանը տեղափոխվում է Քութայիս.- 1in.am):
«Ալիա»-ն, վկայակոչելով իսրայելցի գործարարների փաստաբան Մորդեխայա Ցիվինային, հայտնում է, որ իսրայելցի գործարարները չեղյալ էին հայտարարելու Վրաստանին իրենց ունեցած պարտքը և վճարելու էին այդ գումարի միայն մի մասը։
Այս մասին պաշտոնական մեկնաբանություններ դեռևս չեն տրվել։
Հիշեցնենք, որ այս տարվա նոյեմբերի 7-ին Սաակաշվիլին հայտարարել էր, թե Քութայիսում Վրաստանի խորհրդարանի առաջին նիստը տեղի է ունենալու 2012 թվականի մայիսին, սակայն խորհրդարանն ամբողջովին Քութայիս կտեղափոխվի 2012 թվականի հոկտեմբերին կայանալիք խորհրդարանական ընտրություններից հետո։