ԲՀԿ-ական պատգամավոր Վարդան Բոստանջյանը այսօր «Առաջին լրատվական»-ի հետ զրույցում հերքեց այն լուրերը, թե ՀՀԿ-ի և ԲՀԿ-ի միջև տարաձայնություններ կան. «Հավատացնում եմ ձեզ, ոչ մի նման բան չկա»:
Օրերս ԲՀԿ առաջնորդ Գագիկ Ծառուկյանի մամուլի քարտուղար Խաչիկ Գալստյանը «Առաջին լրատվական»-ին ասել էր. «Մենք հետևում ենք իրադարձությունների զարգացմանը, սակայն վերջնական գնահատականներ դրանց վերաբերյալ կտանք ավելի ուշ: Հատուկ գնահատականներ և եզրակացություններ կտրվեն Գագիկ Ծառուկյանի՝ Հայաստան վերադարձից հետո: Երբ նա վերադառնա, իրավիճակը նրան կներկայացվի»:
ԲՀԿ-ական պատգամավոր Վարդան Բոստանջյանին, ով ԱԺ նիստում նշեց, որ «Բարգավաճ Հայաստան» կուսակցությունը ԱԺ նախագահի պաշտոնի ընտրությանը պաշտպանելու է Սամվել Նիկոյանին, հարց ուղղեցինք` հնարավո՞ր է, որ առաջիկա խորհրդարանական ընտրություններում ԲՀԿ-ն ՀՀԿ-ի հետ միասնական ցուցակով հանդես գա: «Այդ հարցի վերաբերյալ չենք խոսել, այս պահին գոյություն ունի այնպիսի մոտեցում` համաձայն որի բոլոր քաղաքական ուժերը, գոնե հայտնի, պետք է առանձին գնան ընտրությունների: Բայց եթե ելնելով երկրի շահերից՝ հանկարծ ստացվի այնպես, որ ավելի մեծ դիրքերում կանգնածները, որոշում կայացնողները մտածեն, որ մեր երկրի շահերից ելնելով հարկավոր է միասնական` այդ ժամանակ Բոստանջյանը ի՞նչ կարող է ասել ձեզ…»,- նկատեց պատգամավորը:
«Առաջին լրատվական»-ի դիտարկմանը, որ ԲՀԿ առաջնորդ Գագիկ Ծառուկյանը վերադարձել է Հայաստան, և տեղեկություններ կան, որ նա հանդիպել է Սերժ Սարգսյանի հետ, տեղյա՞կ եք այդ հանդիպման մանրամասներին` նա պատասխանեց. «Տեղեկություն չունեմ այդ հանդիպման մասին»: Իսկ ԲՀԿ-ական պատգամավորները հանդիպե՞լ են պարոն Ծառուկյանի հետ` հարցին պատասխանեց. «Չէ, չի եղել նման հանդիպում…»: Բոստանջյանը հավելեց, որ Ծառուկյանի վերադարձից հետո ՀՀ նախագահի աշխատակազմի նախկին ղեկավար Կարեն Կարապետյանի մոր հուղարկավորությանն են միայն հնարավորություն ունեցել հանդիպել նրան: